DILI, (TATOLI) – PreZidente Repúblika, Francisco Guterres Lú Olo, husu ba Governu atu halo reviZaun ba estatutu militár nomos a pesoál militár ba institutisaun F-FDTL tanba seidauk define loloos sira nia dever, direitu no karaterístika nu’udar forsa.
“Relasiona ho ida-ne’e, ita presiza define loloos estatutu ba pesoál militár ne’ebé serbí iha Forsa Defeza nian, hahú ho Estatutu kondisaun militár ne’ebé seidauk define tuir lei, hodi identifika loloos kondisaun militár no tuir fali halo revizaun ba estatutu militár sira-nian, atu haree loolos sira-nia dever, direitu no karaterístika seluseluk ne’ebé haketak sira hosi funsaun públika, iha ita-nia Estadu”, hatete Xefe Estadu iha ámbitu komemorasaun aniversáriu transformasaun FALINTIL ba FALINTIL- F-FDTL ba dala 18 2 iha Kuartel Jerál Fatuhada, ohin.
Tuir Xefe Estadu estatutu militár no estatutu pesoál militár importante atu dezenvolve liután forsa iha futuru.
“Área relevante seluk ida ne’ebé ita presiza konsidera mak oinsá valoriza profisaun militár no respeita kondisaun militár sira”, tenik tan.
Alende ne’e, husu atu hametin no haburas reforma lezislativa ne’ebé la’o hela tuir konseitu estratéjiku defeza no seguransa.
Reforsa formasaun rekursu umanu no sosa ekipamentu ba forsa sira, inklui promove partisipasaun forsa iha misaun pás nu’udar fatór dezenvolvimentu, motivasaun no prestíjiu ba nasaun.
Forsa nu’udar kompete ba Estadu tanba ne’e tenke kaer-metin orden, asegura defeza no promove sosiedade nia moris-di’ak no progresu.
Orgaun soberania sira seluk, hanesan Governu, parlamentu nasionál no tribunál sira mós hola papél importante ba dezenvolvimentu instituisaun F-FDTL tanba ne’e tenke fó apoiu efetivu ba lalaok no kondisaun instituisaun intermu polítika no orsamentu.
Prezidente Supremu ne’e apresia ba prestasaun servisu ne’ebé instituisaun ne’e presta hodi garante pás no estabilidade ba nasaun no povu.
“Hatudu mós maturidade boot, apartidarizmu, katak, la haliis ba partidu ne’ebé de’it, lealdade ba podér polítiku eleitu, no respeitu ba konstituisaun no lei sira. Nune’e, FALINTIL-FDTL kontribui maka’as ba ita afirma ita-nia soberania no hametin ita-nia estabilidade no demokrasia”, realsa tan.
Jornalista: Agapito dos Santos
Editora: Rita Almeida
