Xefe Estadu Husu Governu Ezekuta OJE 2019 Ba nesesidade Povu

0
228
Prezidente Repúblika, Francisco Guterres Lú Olo, ba jornalista sira hafoin kuda ai-oan iha área salaun Nobre Lahane, sesta, (8/2/2019). Imajen Egas Cristovão

DILI (TATOLI)—Prezidente Repúblika, Francisco Guterres Lú Olo, husu ba Governu atu ezekuta orsamentu jerál Estadu (OJE) 2019 hodi responde povu nia nesesidade.

“Orsamentu ha’u promulga tiha ona, klaru katak orsamentu ba povu ninian. Ha’u husik hela ba parte ezekutivu (Governu) para bele ezekuta orsamentu ida ne’e atu bele responde povu nia nesesidade tuir sira nia planu no programa. Hosi fali sorin mós ha’u apela ba Parlamentu Nasionál para halo fiskalizasaun ba OJE ne’e nune’e orsamentu ida ne’e fila duni ba povu no atu hadi’a povu nia moris,” Lú Olo ba jornalista sira iha Palásiu Nobre Lahane, Dili, sesta ne’e, relasiona ho OJE 2019 ne’ebé Xefe Estadu promulga ona.

Nia hatutan, en-termus persentuais, orsamentu ne’e sa’e no en-termus nominais, orsamentu ne’e nafatin hela de’it, tanba ne’e, la signifika Prezidente Repúblika konkorda ho polítika ida ne’ebé Parlamentu Nasionál halo.

“Maibé ha’u bele hateten katak orsamentu maka ida ne’e duni ona. Se sira hanoin katak lori orsamentu ida ne’e atu ba hadi’a povu nia moris, husik sira lori ba hadi’a para ita hein nia rezultadu,” Lú Olo tenik.

Kona-ba kandidatu membru Governu ne’ebé seidauk hetan tomada pose, nia hatán, membru Governu ne’e kompeténsia Primeiru-Ministru nian para bele hili sé de’it maka atu sai membru Governu no nia kontinua husu atu pondera kandidatu membru Governu na’in 9 ne’ebé seidauk simu pose.

Entretantu antes ne’e, iha loron 31 fulan-Janeiru tinan 2019, Parlamentu Nasionál aprova ona versaun foun proposta lei Orsamentu Jerál Estadu nian ba tinan 2019 ho votu a favór 40 no kontra 25.

Deputadu sira hatán ba preokupasaun sira ne’ebé foti husi Prezidente Repúblika, ne’ebé veto ona dokumentu versaun dahuluk nian, bainhira aprova proposta alterasaun tolu, dahuluk nian kona-ba hamenus tiha osan dolar amerikanu millaun 650, ne’ebé destina ba sosa Greater Sunrise, daruak nian, refere ba valór boot ne’ebé sei hasai ba Fundu Petrolíferu, maka dolar amerikanu millaun 1.196, 4 no datoluk nian, kona-ba valór totál ne’ebé loos despeza OJE nian ne’ebé maka nia valór dolar amerikanu millaun 2.132 sai ba millaun 1.482, ne’ebé permite redusaun signifikativa ida maizumenus 30%.

Primeiru-Ministru, Taur Matan Ruak, iha nia intervensaun hateten fila-fila katak” Governu hakarak, liuhosi Orsamentu Jerál Estadu, disponibiliza rekursu sira ba reforsu efisiénsia no efikásia instituisaun públika sira nian iha prestasaun servisu ba sidadaun no empreza sira ne’ebé, lejitimamente, hakarak hetan saúde, edukasaun, empregu, hela-fatin, mobilidade, ambiente negósiu ne’ebé di’ak liután, no oportunidade ne’ebé barak liután ba ema hotu”. Maibé atu alkansa oportunidade hirak ne’e” tenke fó ba Estadu orsamentu ida ne’ebé maka lalais liu” tenik Primeiru-Ministru.

Dekretu Parlamentu Nasionál Nú. 5/V kona-ba orsamentu jerál Estadu (OJE) 2019 Prezidente Repúblika (PR), Francisco Guterres Lú Olo, promulga  iha Kinta (horisehik-red)  ne’e iha Palásiu Prezidente Nicolau Lobato, Bairru Pité.

Jornalista: Xisto Freitas

Editór : Manuel Pinto

HUSIK IDA HATÁN