Traballadór Kmanek Sente Lakon Sira-Nia Serbisu

0
158
Traballadór Kmanek hala'o konferénsia imprensa sobre problema ne’ebé sira hasoru.

DILI, (TATOLI) – Jorge Madeira, serbisu na’in ida iha Kmanek Supermerkadu tenke lakon nia serbisu tanba krize finanseira ne’ebé nia empreza hasoru maski iha hanoin nafatin atu kontinua serbisu hodi sustenta nesesidade loroloron liuhusi rendimentu ne’ebé nia valór la’ós boot liu, maibé para ona tanba empreza fó sai ona naran atu fó ona kompensasaun ba nian hamutuk ho kolega sira seluk.

“Ami hanesan traballadór sente lakon ami-nia serbisu tomak no dalaruma ami bele dehan lakon ami-nia nesesidade loroloron, atende ami-nia família tanba osan ida ami simu ne’e tuir ita-nia kultura Timór entaun dalaruma ami gasta tiha hotu laiha ona”, traballadór ne’ebé hala’o nia serbisu iha departamentu ko’a na’an iha Kmanek Trading Hudi-Laran ne’e dehan.

Nia hatete hanesan serbisu-na’in ne’ebé mai hela iha kapitál Timór ne’ebé aluga uma hodi sai mahon ba nia, osan ne’ebé hetan liuhusi kompesasaun ne’e lasufisinte.

“Ami hakarak ne’e serbisu, mas ami triste maka ami lakon ona ami-nia bikan. Ami-nia osan ida simu ba kompensasaun ne’e la’ós boot entaun ami gasta ne’e nia durasaun fulan ida rua bele hotu tanba serbisu foin tinan ida ka rua”.

Hatutan tanba foin tama tinan ida ho balun maka sei hetan kompensasaun ba tinan ida husi saláriu ne’ebé nia simu kada fulan $150 ne’e, osan ne’ebé empreza fó la uza kle’ur bele hotu no labele halo buat ida tanba osan ne’ebé fó ne’e sei selu ba deve sira ne’ebé iha.

“Esperansa ami sai ne’e bele hetan serbisu, mas nia tempu naruk tanba ita iha Timor-Leste postu serbisu mínimu liu, ema ida buka serbisu barak liu duké ida serbisu, ne’ebé sente susar tanba ami mai ho ami-nia nivel ida mínimu sekundária barak entaun ita-nia nasaun ne’e tinan-tinan mai ho rekursu umanu ida lisensiadu entaun ami ida ne’e bá ne’ebé?”.

Nia dehan tanba laiha ona serbisu maka dalan ida ba dezempregu no situasaun ida agora laiha kompañia ida brani atu fó serbisu ba sira.

“Ami-nia kompensasaun ne’ebé ami-nia diretór kompañia fó ba ami justu, tuir lei tanba ami iha Kmanek ami-nia serbisu hanesan mós ho Governu, iha lisensa anuál, iha mós lisensa ba kultura, iha mós deskansa loron rua no ami-nia kompensasaun hotu ami-nia diretór sura kedan traballadór tuan 10 resin ne’ebé dezde Kmanek hahú iha Bidau to’o agora nia kompensasaun nia selu ho justu no transparente”.

Nia haktuir kona-ba traballadór 61 ne’ebé naran taka sai ona atu labele kontinua serbisu ne’e empreza na’in halo ona sorumutu hodi promete atu selu sira-nia kompensasaun iha semana rua nia laran.

“Ami-nia naran taka, nia rasik halo enkontru ho ami dehan ha’u selu hotu, mas semana rua. Taka naran hahú loron 1 até 14 (fevereiru) ami hotu simu ami-nia kompensasaun”.

Lito da Costa, Xefe Armazein Maran, ne’ebé haknaar an iha empreza durante tinan sia dehan kompensasaun ne’ebé sei hetan ne’e sei rai hamutuk hodi aguenta atu buka serbisu karik iha posibilidade hetan tanba hein de’it osan ida ne’e susar tanba gasta la kle’ur hotu.

“Iha planu atu loke kioske mas ita foin hahú ema dook tiha ona ne’ebé hanoin atu loke kioske oan ruma, mas sente tarde ona”.

Nia afirma kontente tebes serbisu iha fatin ne’e tanba Kmanek ne’e fó moris ba nia. “Ba ha’u hanesan timoroan serbisu ne’e ha’u kontente tanba fó saláriu sufisiente no serbisu kle’ur iha fatin ne’e tanba sistema di’ak, maibé triste tanba rona nia atu hapara traballadór etapa pur etapa”, katak nia maski naran seidauk fó sai no sei hein iha faze daruak nian.

“Buat ne’ebé nia promete ba ami nia sei selu ami ida pur ida to’o hotu tuir ida-idak nia tinan serbisu. Bainhira lahetan serbisu iha fatin ruma hanoin atu halo buat ruma para bele moris tanba ida ne’e la’ós finál tanba sei iha oportunidade iha fatin seluk”.

Sidónio da Conceição, Supervizór iha Kmanek Trading Hudi-Laran, traballadór ne’ebé hala’o nia knaar dezde maiu 2002 to’o agora ne’e dehan hakarak kontinua serbisu iha empreza ne’e no bainhira prontu ona mak husik empreza ne’e, maibé lato’o tempu ida hakarak tenke sai tanba krize ne’ebé hasoru maski daudaun ne’e nia naran seidauk fó sai.

Nia hatete liuhusi kompensasaun ne’ebé sei hetan maka ho esperiénsia durante tinan barak serbisu iha empreza ne’e tenta atu halo negósiu ki’ik ida, la’ós iha Dili, tanba fatin susar atu hetan maka halo iha foho tanba iha Dili ne’e bainhira atu halo planu ba buat ida ema halo tiha ona, tanba ne’e tenke fila bá foho bainhira realidade ne’e akontese.

Jornalista: Maria Auxiliadora

Editora: Rita Almeida

Lee mós :

Kmanek Supermerkadu Hahú Rekompensa Traballadór 61

 

HUSIK IDA HATÁN