DILI, (TATOLI) – Timor-Leste Press Union (TLPU), ohin, fó solidariedade ba jornalista Filipina, Maria Ressa, liuhosi hato’o petisaun ba Embaixada Filipina iha Timor-Leste, tanba jornalista ne’e hetan kondenasaun hosi ninia ukun nain.
“TLPU halo audiénsia, no ohin hola prezensa iha Embaixada Filipina hodi hato’o petisaun liuhosi asaun solidariedade ba jornalista Maria Ressa ne’ebé hetan kondenasaun hosi Prezidente Durtete Filipina”, Prezidente TLPU, Quito Simões, ba jornalista sira hafoin entega karta petisaun ba Embaixada Filipina iha Timor-Leste, ohin.
Prezidente TLPU akresenta: “Ami hakarak manifesta ami nia solidariedade ba jornalista Maria Ressa atu liberta nia hosi akuzasaun sira inklui ba pena multa”.
Tanba ne’e mak TLPU hola nia pozisaun atu husu ba Estadu Filipina liberta totál kolega jornalista Maria Ressa, inklui TLPU mós ezije atu iha nafatin liberdade imprensa no espresaun.
“Ami fiar katak ho karta ne’ebé TLPU hola, inklui jornalista sira iha mundu husu atu anula desizaun hosi Estadu Filipina hodi foti desizaun ruma absolutamente ka fó liberdade ba Maria Ressa”, espera.
Enkuantu, Jornalista Maria Ressa hanesan jornalista investigativu ida iha CEO platform online Rappler iha Filipina, nia publika artigu ida ho investigativa kona-ba desizaun balun hosi Prezidente Filipina, Rodrigo Durtete, ne’ebé halo kontra ema nian direitu.
To’o ikus, nia hetan kapturasaun no lori ba prosesu justisa, nune’e fó pena prizaun ba nia maibe ikus mai liberta hosi prizaun no nia iha dever tomak atu selu indeminizasaun.
Entetantu, jornalista Maria Ressa uluk hala’o nia misaun iha Timor-Leste iha momentu okupasaun Indonezia no iha tempu indonesia Timor-Leste.
Inisiu hosi kazu ne’e bainhira emprezáriu hosi kompañia SUV, Wilfredo Kengwas, deklara la satisfas ho publikasaun Rappler iha maiu 2012.
Iha publikasaun ne’e Rappler relata relatóriu intelejénsia katak, Kengwas tama iha lista nuudar rede droga no tráfiku ema.
Mesmu artigu ne’e mídia Rappler halo ona balansu hodi entrevista Kengwas, maibé nia sente Rappler halo defamasaun, nune’e nia keixa Maria Ressa nuudar autór ba artigu ne’e ho lei krime ba informasaun (krime cibernètiku).
To’o ikus tribunál aplika medida koasaun ho garante osan peso 100.000 ekivalente ho US$1,912.25.
Jornalista: Zezito Silva
Editora: Rita Almeida
