Tinan Ne’e EDTL Transforma Ba EP

0
199
Ministru Obras Públikas, Salvador Soares dos Reis Pires. Imajen Egas Cristovao

DILI, (TATOLI) – Tuir polítika governu da-ualu, tinan ne’e diresaun Eletrisidade Timor-Leste (EDTL) sei transforma ba Empreza Públika, hodi aumenta reseita ba kofre Estadu nomos hasa’e volume fornesementu eletrisidade ba povu iha teritóriu ne’ebé falta porsentu 17 seidauk asesu naroman.

Ministru Obra Públika (MOP), Salvador Eugénio Soares dos Reis Pires, hatete populasaun porsentu 83 maka asesu ona eletrisidade, tanba ne’e ho transformasaun EDTL ne’e sei rezolve fornesementu liña eletrisidade  ba povu.

“Ami iha ona prosesu ida prepara hela lei transformasaun EDTL ba empreza públika atu sustenta operasaun, liuliu hasa’e reseita ba Estadu bazea ba polítika governu ba reforma fiskál integradu ne’ebé governu planea”, dehan ministru ba jornalista sira iha Palásiu Governu, ohin.

Nia dehan lei no regulamentu  importante hodi  regula lalaok funsionamentu instituisaun ne’e bainhira nakfila ba EP.

Alende prepara lejislativa, MOP  halo ona enkontru ho Komisaun Funsaun Públika hodi buka solusaun ba destinu funsionáriu públiku ne’ebé servisu iha EDTL.

Governante haktuir tanba sei oferese opsaun rua ba funsionáriu sira atu eskolla ida maka mantein estatutu hanesan funsionáriu públiku no ida seluk maka rejigna-án hodi sai nu’udar  funsionáriu empreza.

“Sira ne’ebé hili funsionáriu públiku ami sei halo destakamentu, tanba ne’e maka agora ami koopera hela komisaun funsaun públika atu prepara estratejia ba destakamentu iha instituisaun sira ne’ebé bele akomoda sira”, dehan nia.

Funsionáriu públiku 500 resin maka oras ne’e servisu iha EDTL ne’ebé servisu iha área tékniku no administrasaun.

Jornalista: Agapito dos Santos

Editora: Rita Almeida

HUSIK IDA HATÁN