DILI, (TATOLI) – Ministra Finansa Interina, Sara Lobo Brites, klarifika saláriu fulan janeiru ba funsionáriu kontratadu sira tama tarde tanba alende aplikasaun duodésimu tarde, ministériu balun mós hatama dadus ba sistema tarde.
“Foin dadaun atraza uitoan tanba ita iha duodésimu iha fulan janeiru hahú tarde uitoan, ita mós fó tempu para ema hatama dadus”, tenik ba jornalista sira ohin hafoin hasoru malu ho Xefe Governu hodi atualiza implementasaun duodésimu, iha Palásiu Governu, ohin
Nia hatutan: “Payroll iha kalendáriu ne’ebé mak fiksu fulan-fulan husi loron 1 to’o 15 tenke hatama dadus iha sistema, apartir iha loron 15 ba leten sira prepara hodi lori ba banku hodi selu”.
Governante ne’e dehan tan, kontratu sira ne’ebé mak prosesu tarde hanesan tama finansa tarde, entaun ne’e sei atraza.
“Ita laiha dadus tanba ne’e presiza konfirma ba ministériu sira”.
Hodi hatutan esplikasaun, funsionáriu iha tipu rua, permanente no temporáriu, permanente sira iha oráriu payroll no laiha prazu kontratu tanba ne’e selu tuir kalendáriu.
Enkuantu, kestaun kontratadu sira, hanesan funsionáriu sira ne’ebé iha kontratu tempu badak. “Ida ne’e ministériu ida-idak bainhira selu sira nia saláriu tenke renova lai kontratu”.
Nia mós informa enkontru regular ho Primeiru-Ministru, Taur Matan Ruak, hodi atualiza semana oin bele hatama iha ajenda Konselku Ministru kona-ba duodésimu iha fulan-fevereiru.
“Montante duodésimu ba fevereiru hamutuk milkiaun $95, totál saldo ne’ebé mak sei iha hamutuk milliaun $200 resin, tanba ne’e sei to’o”, katak.
Sara realsa aplikasaun duodésimu fulan janeiru nia foin mak taka no ezekusaun ba fulan ne’e ba de’it saláriu no bens no servisu, kapitál infraestrutura laiha.
Entretantu, liuhosi reuniaun ezekutivu, aprova aplikasaun duodésimu fulan janeiru nia iha loron 9 janeiru, enkuantu orsamentu ne’ebé mak aloka iha fulan janeiru hamutuk milliaun $71 hodi funsiona mákina Estadu no selu saláriu ba funsionáriu sira.
Jornalista: Julia Chatarina
Editora: Rita Almeida
