Razaun PR Promulga OJE 2019 Mak Haburas Ekonomia

0
96
Prezidente Repúblika, Francisco Guterres Lú Olo. Imajen António Gonçalves

DILI, (TATOLI) – Prezidente Repúblika, Francisco Guterres Lú Olo, haktuir ninia razaun promulga Orsamentu Jerál Estadu (OJE) 2019, mak hakarak fó dalan ba Governu selu lalais tusan Estadu ba setór privadu, nune’e kompromisu Estadu nian oinsá haburas ekonomia no povu nia moris di’ak.

“Ita tenke haree ba realidade ohinloron nian, ita tenke manán konsiénsia koletiva kle’an liu kona-ba ita-nia realidade ohin loron no ita-nia futuru nu’udar Nasaun”, afirma Xefe Estadu ba jornalista sira liuhosi konferénsia imprensa iha Palásiu Prezidente Nicolau Lobaro, Bairru Pité, segunda ne’e.

Promulgasaun dekretu Parlamentu Nasionál númeru 5/V kona-ba OJE 2019 ho montante billiaun $1.4 hosi proposta inísiu billiaun $2.1, ho hanoin ida sei benefisia ferik no katuas-sira, maluk sira ne’ebé simu bolsa-de-mãe, labarik sira-nia merenda eskolár, veteranu no sidadaun seluk ne’ebé sei simu transferénsia públika.

Lú Olo fiar katak hotu-hotu iha devér atu prepara ba timoroan nia futuru, prepara kondisaun moris-di’ak ba jerasaun abanbairua nian,  hosi lala’ok ka komportamentu ne’ebé hala’o ohin loron.

Iha biban ne’e, nia apela hikas katak ba OJE 2020 sei haree hamutuk oinsá investe iha rekursu renovável sira, rekursu ne’ebé bele uza ba beibeik no oinsá investe iha área oin-oin atu hasa’e moris-di’ak no haburas sosiedade.

Nune’e mós, oinsá aloka osan hosi orsamentu ba tinan hirak tuir mai, atu labele haliis liu ba dezenvolvimentu infraestrutura no hamenus osan ba dezenvolvimentu umanu, realsa.

Ho investimentu ne’ebé halo ho osan hosi OJE, tuir nia tenke hetan  retornu sosiál no ekonómiku aas, fó prioridade liu-liu ba kapitál umanu, edukasaun, saúde no atividade produtiva, hanesan agrikultura nomós empregu.

Lú Olo mós husu ba deputadu sira atu halo desizaun ba OJE ho ekilíbriu no sustentável ba futuru no husu mós ba Governu atu investe osan iha rai-laran liuhosi medida polítika no lejizlativa hodi garante katak sei taka défisit finanseiru iha tinan hira tuir mai. Nune’e, sei la hasai tan osan Fundu Minarai liu Rendimentu Sustentável Estimadu.

Jornalista: Xisto Freitas

Editora: Rita Almeida

HUSIK IDA HATÁN