Prezidente Komisaun B : Presiza Kondisaun Hodi Reativa Atividade Arte-Marsiál

0
109
Deputadu Parlamentu Nasionál, hosi bankada CNRT, Aderito Hugo da Costa

DILI, (TATOLI) – Prezidente Komisaun B Parlamentu Nasionál (PN) ne’ebé trata asuntu Defeza no Seguransa, Adérito Hugo da Costa, hateten atu reativa fali arte-marsiál hanesan Xefe Estadu rekomenda ba governu foin lais ne’e tenke ho kondisaun.

“Iha kampaña eleitorál tinan 2017 no 2018, partidu hotu komprometidu atu reativa arte-marsiál, inklui partidu ne’ebé iha asentu parlamentu maibé tenke reativa ho kondisaun tanba Estadu tenke funsiona hanesan ne’e”, tenik ba jornalista sira iha uma fukun, ohin.

Nia dehan iha 2017 PN atualiza ona lei númeru 5/2017 kona-ba atividade arte-marsiál ho finalidade harii Komisaun Reguladór Arte-Marsiál (KRAM) ne’ebé tutela ba Sekretaria Estadu Juventude no Desportu (SEJD).

“Ita hakarak akompaña kualker konseitu saida de’it mak uza ba prátika arte-marsiál prevee ona iha lei ne’e, regula ezisténsia arte-marsiál ho sira nia atividade tomak. Lei ne’e atu ita bele rejista no informa sobre fatin atu halo treinamentu, prátika arte-marsiál sira no komisaun B mós halo apresiasaun no rekomendasaun sobre posibilidade fatin sira ne’ebé hetan autorizasaun bele taka ou la’e”, katak.

Tuir deputadu bankada CNRT ne’e, kona-ba reativa ou la’e, presiza haree progresu husi komisaun sira ne’ebé estabelese ona ho akordu lei ne’e to’o ne’ebé ona no problema iha saida.

Nia mós levanta uitoan kona-ba situasaun ne’ebé akontese iha munisípiu balun: “Situasaun ne’ebé akontese loron hirak ba kotuk, laiha sidadaun ida pesoalmente ou grupu atu halo swiping ba komunidade nia uma, so autoridade justisa no orden públiku sira mak bele halo swiping”. 

Komisaun B rasik, semana kotuk desloka ba Likisa, hodi haree uma ualu iha aldeia ida ne’ebé destruidu, inklui animal no sasan sira estraga hotu.

“Sei la regula, ema hotu bele halo check point  (pasa revista) no individu bele bolu malu hodi halo swiping ba komunidade nia uma, tanba nia la gosta, ida ne’e labele akontesse iha nasaun ida ne’e, labele iha Dili no teritóriu nasionál ne’e tomak. Ikus mai akontese iha Dili, Likisa, Ermera, Baukau, ita kontente tanba munisípiu seluk laiha, mas ida ne’e tenke prevene”, katak tan.

Nia dehan tan organizasaun ida bainhira eziste iha nasaun ida tenke organizadu, tenke iha estatutu, no tenke iha responsável para bainhira iha akontesimentu ruma ne’ebé liga ho organizasaun ne’e ho atributu organizasaun, responsável sira toma responsabilidade.

“Reativa ho kondisaun mak liña koordenasaun ne’e tenke organizadu, labele desorganizadu, ida ne’e normal, tanba nasaun tenke funsiona. Ami (komisaun B) hakarak akompaña KRAM nia servisu to’o ona ne’ebé ona no rekezitu sira iha lei númeru 5/2017 implementa ona ka seidauk”, argumenta.

Entretantu iha loron 2 jullu 2013, Governu liuhosi Konsellu Ministru estraordinária, hasai rezolusaun Governu númeru 16/2013 kona-ba estinsaun Grupu Arte-Marsiál no determina estinsaun ba grupu PSHT, KERA SAKTI no KORK, hodi bandu totál kontinuasaun ba kualker atividade.

Rezolusaun ne’e define medida lubun ida ne’ebé atu hodi estabelese hikas fali orden públika no hakmatek iha sosiedade, ne’ebé hetan ameasa husi hahalok hirak ne’ebé mak grupu ne’e halo.

Nune’e mós iha PN aprova iha loron 6 marsu 2017 no Prezidente Repúblika promulga iha 12 abril 2017, lei númeru 5/2017 de 19 de abril kona-ba rejime jurídiku kona-ba  prátika de arte-Marsiál, rituál sira, arma branka, rama ambon no kinta alterasaun ba kódigu penál.

Lei ne’e mai hodi kriminaliza prátika no ezersísiu ilísita arte-marsiál no prátika rituál sira iha kontestu arte-marsiál.

Bainhira prátika husi elementu sira F-FDTL, forsa seguransa, majistradu sira, ofisiál justisa, funsionariu estadu no ejente administrasaun públika ne’ebé responsável ba prevensaun no represaun ba atividade ilísita sira ne’ebé ko’alia iha lei ne’e ho pena prizaun tinan 6 to’o 10.

Lei ne’e rasik hafoin públika no la ho sosializasaun ne’ebé di’ak ba povu maibé alerta maka’as liu iha atuasaun.

Jornalista: Julia Chatarina

Editora: Rita Almeida

HUSIK IDA HATÁN