PR Bolu Urjente Ministru Defeza no Seguransa

0
281
Ministru Defeza nomós Ministru Seguransa Interinu, Filomeno Paixão. Imajen: Antonio Goncalves

DILI (TATOLI)—Prezidente Repúblika (PR), Francisco Guterres Lú Olo bolu urjente Ministru Defeza no Seguransa, Filomeno da Paixão de Jesus tanba preokupa liu ho situasaun seguransa iha Timor-Leste liu-liu konflitu entre artes marsiais iha Dili, Baukau no Liquiça ne’ebé konsege rezulta vítima lubuk ida.

“Prezidente Repúblika nia hanoin maka di’ak liu reativa fali artes marsias maibé liuhusi regulamentu normál para bele regula sira nia lala’ok no sei la’o tuir de’it Asosiasaun Desportu ka Asosiasaun Arte hodi kompete iha kompetisaun nivel nasionál, rejionál no internasionál,” Filomeno ba jornalista sira iha Palásiu Prezidente Nicolau Lobato, Bairru Pité, segunda ne’e.

Nia dehan, bainhira submete ona ba Asosiasaun Desportu, sei la inklui krime iha laran no karik iha krimi entaun sei kriminaliza tuir Kódigu Penál hateten.

Filomeno haktuir katak polísia nia atuasaun ba konflitu refere di’ak teb-tebes tanba foin fulan ida de’it maibé kaptura ona elementu artes marsiais hamutuk 43 no oras ne’e entrega ona ba iha parte judisiál atu prosesa.

“Problema artes marsiais ne’e nu’udar problema ne’ebé haree ba vertente barak. Ita labele haree hosi vertente PNTL no F-FDTL de’it maibé haree mós ba vertente sira seluk hanesan sósiu ekonómiku, kulturál no polítika ne’ebé kontribui ba konflitu artes marsiais,” nia afirma.

Governante ne’e informa, nia simu ona karta hosi Komandu PNTL atu halo atuasaun ba konflitu artes marsiais, tan ne’e, nia halo tiha ona proposta ba primeiru-ministru atu hanoin kria ‘task force’ ida ne’ebé involve hosi PNTL, F-FDTL, Ministériu Justisa, Sekretaria Estadu Juventude no Desportu no responsável arte marsiais para bele avalia Lei Nú. 5 kona-ba regulasaun artes marsiais nian ne’ebé durante ne’e aplika ka lae, tanba iha kapturadu ba elementu artes marsiais hahú  hosi tinan 2016 to’o 2019 ne’e besik ema na’in 500 maibé lahatene sira iha kadeira ida ne’ebé.

Jornalista: Xisto Freitas

Editór : Manuel Pinto

HUSIK IDA HATÁN