ERMERA, (TATOLI)-La’ós ona novidade katak Munisípiu Ermera koñesidu ho nia produtu kafé, ne’ebé la’ós de’it iha rai laran ka merkadu doméstiku, maibé nível internasionál tanba nia orgánika no aroma ne’ebé típiku.
Tanba ne’e, relasiona ho prezensa ekipa korida ba paz ka ‘peace run’, profesór no estudante sira promove produtu lokál munisípiu ne’e nian, alende oferese kafé, sira oferese mós gastronomia lokál sira hanesan batar da’an, fehuk, aifarina, talas no hudi da’an inklui produtu seluk tan ba ekipa estranjeiru sira ne’e, inklui timoroan sira ne’ebé akompaña ekipa ne’e.
“Molok ba fatin seluk, koko lai produtu lokál Ermera nian,” alerta Diretór Ensinu Sekundáriu Jerál (ESJ), Nino Konis Santana (NKS), Gleno-Ermera, António Alves da Costa informa hafoin simu toxa paz nian, husi ekipa korida ba paz, iha edifísiu ESJ, NKS, Gleno-Ermera, ohin.
Nune’e, tuir mai, ekipa sira ne’e ba koko sabór orijinál sira husi produtu munisípu ne’e nian. Tuir observasaun TATOLI nota katak husi produtu sira ne’ebé oferesidu husi profesór no estudante sira ne’e, tantu timoroan nomós ekipa korida ba paz alende produtu seluk kafé ho batar nurak da’an mak sai nu’udar preferénsia. Nune’e kuaze produtu hotu, batar da’an nurak nein hela ida iha meza leten.
Iha fatin ketak, Ensinu Báziku 4 Setembru, Railaku Vila, Munisípiu Ermera oferese mós gastronómia ne’ebé identika ba vizitante sira.
Katak, hafoin ekipa korida ba paz hamutuk ho estudante nomós profesór sira halo reflesaun hakmatek kona-ba saida mak paz ka dame no estudante sira halo aprezentasaun dansa kultura, ekipa korida ba paz fó sertifikadu apresiasaun ba Ensinu Báziku 4 Setembru Railaku no foto hamutuk, dala ida tan, Diretór Eskola, Sebastião de Oliveira konvida ekipa ne’e hodi toma almosu ba produtu lokál sira ne’ebé sira preparadu ona, molok prezensa ekipa korida ba paz.
Iha konversa informál ho Ajénsia TATOLI, IP, membru ida husi ekipa korida ba paz, Agraha Levin, husi Estadu Unidu Amérika (EUA) hateten katak produtu sira timoroan nian iha sabór di’ak tebes.
Nune’e mós konsidera katak timoroan sira, nu’udar povu ne’ebé ‘nakloke ka aberta’ hodi simu ka hospede bainaka sira ka ema seluk. “Povu timoroan sira laran luak loos,” konsidera membru Chimnoy Centre International Liaison, EUA ne’e.
Entretantu, durante viajen, ekipa korida ba paz internasionál ne’ebé kompostu ema na’in sanulu hanesan Salil Wilson (Austrália), Agraha Levin (EUA), Harashita Sunaoshi (Japaun), Prince Dupokusumo ho Princes Febri Haryu (Indonézia), Nicholaus Drekonja (Austria), Jana Duskova (Repúblika Cezko), Enyi Anadelcia Juarez Mendez (Guatemala), Boijayanti Cassandra Gomes Badillo (Puerto Rico) no Viliam Segeda (Slovakia), tuun mós iha parte Railako nian hodi observa natureza fatin ne’e nian no demonstra sentimentu impresionadu ho natureza timoroan nian ne’ebé furak.
Inklui, halo mós animasaun balun tuir karakter país orijen idaidak nian ba profesór no estudante sira husi ensinu báziku 10 Abril 1999 Gleno-Ermera, ESJ, NKS, Gleno no Ensinu Báziku 4 Setembru Railaku Vila, Munisípiu Ermera no hetan entuziazmu husi estudante sira iha estabelesimentu ensinu tolu ne’e, iha sira-nia vizita.
Jornalista: Rafy Belo
Editór : Manuel Pinto
