DILI, (TATOLI) – Ministru Obra Públika, Salvadór Eugénio Soares dos Reis Pires, aprezenta lista projetu tuir planu Orsamentu Jerál Estadu (OJE) 2019, ba Primeiru-Ministru (PM), Taur Matan Ruak.
“Ohin diskute ho Primeiru-Ministru kona-ba preparasaun ezekusaun orsamentu Ministériu Obras Públikas 2019 nian, kona-ba lista estrada, projetu bee no eletrisidade ne’ebé ami prepara hela no agora dezenvolve hela atu bele tender (konkursu) iha 2019 nia laran”, tenik nia ba jornalista sira iha palásiu governu, ohin.
Nia dehan ho montante orsamentu milliaun $10 husi totál OJE 2019 sei dezenvolve infraestrutura iha rai laran.
“Montante uluk tau milliaun $10, osan ne’e tau iha planu atu tinan 2020 ba oin bele implementa lista projetu ne’ebé ohin ha’u aprezenta ba Primeiru-Ministru hodi kontinua dezenvolve planeamentu no implementa iha 2020″, afirma.
Tuir Governante ne’e projetu hirak ne’ebé aprezenta kobre teritóriu tomak iha 2019. Alende ne’e, iha mós kapital dezenvolvimentu milliaun $16 atu halo estrada rurál hamutuk 90 resin, inklui manutensaun no reabilitasaun.
Nune’e mós milliaun $11 ba estrada urbana munisipál, nasionál ho milliaun $10 ba bee ho atendimentu emerjénsia.
Biban ne’e, ministru mós ko’alia kona-ba suku balun ne’ebé to’o agora seidauk asesu ba eletrisidade.
“Kona-ba eletrisidade, ha’u ko’alia ho Primeiru-Ministru katak ita estabese ona ekipa iha Gabinete Ministru no Diresaun Jerál Eletrisidade, prepara ekipa ne’e atu estabelesse dadus hodi komesa halo dezeñu ba suku 60 ne’ebé seidauk asesu eletrisidade, nune’e 2020 ita komesa disgragega no halo implementasaun fíziku ba suku sira ne’e”, katak.
Jornalista: Julia Chatarin
Editora: Rita Almeida
