MNEK Atualiza Informasaun Timor-Leste Ba Diplomata Sira

0
92
Foto hamutuk entre diplomata sira. Foto TATOLI: Rafy Belo

DILI, (TATOLI) – Ministériu Negósiu Estranjeiru no Kooperasaun (MNEK) atualiza informasaun ba korpu diplomátiku no konsulár sira ne’ebé rezidente iha Timor-Leste kona-ba situasaun rai laran liliu preparasaun tinan 20 ba loron konsulta populár 30 agostu no prezensa Forsa Internasionál ba Timor-Leste (INTERFET-sigla inglés), ne’ebé sei realiza iha fulan hirak tuir mai.

Diretór Jerál ba Asuntu Bilaterál, Isílio Coelho haktuir ba jornalista sira hafoin enkontru katak, primeiru, Ministru Negósiu Estranjeiru no Kooperasaun, Dionísio Babo Soares, atualiza ba korpu diplomátiku ne’ebé akreditadu iha Timor-Leste kona-ba situasaun polítika atuál nomós prioridade balun Timor nian.

“Ministru mensiona kona-ba ita-nia adezaun ba ASEAN, ita-nia relasaun ho CPLP nomós G7+. Fó mós oportunidade ba reprezentante korpu diplomátiku para hato’o sira-nia hanoin kona-ba buat ne’ebé sira presiza hatene. Ko’alia kona-ba selebrasaun aniversáriu INTERFET nian”, informa Diretór Isílio Coelho iha Edifísiu MNEK, Praia dos Coqueiros, ohin.

Diretór ne’e mós konfirma MNEK esklarese di’ak tebes ba diplomata ka konsulár sira no sira asesu informasaun sira hotu nomós responsabilidade MNEK nian; hodi governu nia naran, fó hatene ba sira.

“Ha’u sente reasaun di’ak hela tanba sira mós akompaña dezenvolvimentu polítiku país nian i informasaun ne’ebé señor ministru hato’o ba sira koresponde ba sira-nia espetativa. Husi observasaun ida ne’ebé ha’u haree, ha’u sente sira-nia reasaun di’ak hela”.

“Ministru mós fó enfaze ba prosesu demokratiazasaun, entaun buat ne’ebé akontese mós hanesan prosesu demokratizasaun. Entaun, buat ne’ebé akontese mós hanesan prosesu konsolidasaun demokrátiku iha ita-nia rain”, hateten diretór ne’e.

Iha fatin hanesan, embaixadór Austrália ba Timor-Leste, Peter Robert, haktuir MNEK esplika ba sira kona-ba situasaun polítika iha Timor-Leste no ko’alia uitoan kona-ba aniversáriu tinan 20 ba loron INTERFET no konsulta populár.

“Ami kontente tebes tanba ha’u sente katak aniversáriu ida ne’e tanba partisipasaun INTERFET ba Timor-Leste importante tebes”.

Diplomata Australianu ne’e mós akresenta Austrália nu’udar parseiru, nu’udar viziñu, sente ne’e importante ba Austrália.

“Ha’u fiar katak ema barak husi Austrália mai iha aniversáriu hanesan ne’e”, nia konsidera.

Embaixadór Peter Robert konsidera ligasaun entre Austrália no Timor-Leste forte no ligasaun entre veteranu, povu no povu.

“Ha’u ko’alia ho veteranu iha Austrália no veteranu barak mós hakarak vizita fali Timor-Leste ba aniversáriu no hamriik hamutuk povu Timor-Leste, iha tempu mai no ba futuru”, dehan diplomata ne’e.

Relasiona ho loron istóriku importante rua ne’e, antes ne’e, Sekretáriu Estadu ba Asuntu Kombatente Libertasaun Nasionál (SEAKLN), Gil da Costa Monteiro ‘Oan Soru’, enkontru Ministru Negósiu Estranjeiru no Kooperasaun (MNEK), Dionísio Babo Soares, hodi koa’lia kona-ba preparativu ba loron importante rua.

Loron importante ne’e mak 30 agostu loron konsulta populár no 20 Setembru, loron INTERFET mai Timor.

Sekretáriu Estadu, Gil da Costa Monteiro ‘Oan Soru’, hafoin enkontru, haktuir ba jornalista katak SEAKLN enkontru ho MNEK tanba iha Konsellu-ministru ida ohin, SEAK aprezenta programa ida kona-ba komemorasaun tinan 20 loron Konsulta Populár, ne’ebé akontese iha 30 agostu no tinan 20 loron INTERFET mai Timor-Leste iha 1999.

“Tanba ne’e mak presiza  atu halo selebrasaun ida, ne’ebé iha polítika ida ne’e, ohin aprezenta iha Konsellu-ministru, Primeiru-ministru hateten ona atu reuniaun ho Ministru Negósiu Estranjeiru ho Ministru em ezersísiu Estatál maibé nia la marka prezensa iha ne’e”, katak Oan Soru iha edifísiu MNEK, Praia dos Coqueiros, ohin lorokraik ne’e.

“Komu ha’u mai ona iha ne’e hamutuk ho ministru negósiu estranjeiru, ami iha ona reuniaun, hahú para haree polítika oinsá bele estabelese komisaun organizadora komemora tinan 20 ba loron konsulta popular iha 1999 hanesan mós 20 setembru, INTERFET halo tinan 20 hotu”, katak tan.

Governante ne’e akresenta sei lori hanoin ne’e ba iha Konsellu-ministru hodi hetan desizaun.

“Para legaliza komisaun organizadora ida ne’e ho nia estrutura sira atu bele organiza eventu ne’e  iha fulan agostu ou setembru mai oin”, katak tan.

Sekretáriu estadu ne’e mós konfirma enkontru ne’e nu’udar prosesu inisiál ida atu prepara uluk komisaun organizadora. Depois mak sei aprezenta planu eh programa sira.

Jornalista: Rafy Belo

Editora: Rita Almeida

HUSIK IDA HATÁN