iklan

NASIONÁL, EKONOMIA

MF Sei Lansa Pakote Orsamentu 2019 Iha Semana Oin

MF Sei Lansa Pakote Orsamentu 2019 Iha Semana Oin

Diretór Jerál Finansa Estadu Ministériu Finansa (MF), Januario da Gama, bainhira ko’alia iha panorama orsamentál 2019 iha MF Aitarak Laran. Imajen Egas Cristovão

DILI, (TATOLI) – Diretór Jerál Orsamentu Estadu Ministériu Finansa (MF), Januário da Gama, hatete MF sei halo lansamentu ba pakote orsamentu 2019 iha semana oin (segunda) nune’e ministériu no instituisaun Estadu sira bele hahú ona sira-nia ezekusaun orsamentál.

“Husi prosesu sira ne’e hotu sistema ida atualizasaun ba GRP (Planeamentu Rekursu husi Governu) kuaze besik hotu ona no parte sistema nian sei halo verifikasaun finál, se ida ne’e hotu sei fasilita tebes distribuisaun (pakote) iha semana oin ne’e”, Januário afirma ohin iha Aitarak-Laran.

Diretór Jerál ne’e dehan hafoin Orsamentu Jerál Estadu 2019 promulga husi Prezidente Repúblika, téknikamente MF hahú haree ona preparasaun ba kondisaun oinsá bele halo lansamentu ba pakote orsamentu aprovadu no momentu ne’e MF finaliza ona proposta dekretu ezekusaun Orsamentu Jerál 2019.

Nia dehan dadaun haruka ona ba gabinete Ministru Reforma Lejislativa no Asuntu Parlamentár depois bele halo revizaun balun iha ne’ebá no bele haruka mós ba ministériu sira atubele bele hetan feedback (komentáriu) ruma antes atu halo aprezentasaun ba Konsellu Ministru.

Hatutan forma dekretu ezekusaun ne’e obrigatoriamente tenke liuhusi Konsellu Ministru depois halo aprovasaun hafoin maka utiliza, tanba ne’e hanesan giaun ida ba ezekusaun OJE nian.

“Dekretu ezekusaun nia forma retroativu, nia atu regula husi inísiu janeiru to’o dezembru, pur tantu prosesu ne’e la’o”, katak.

Januário da Gama salienta fevereiru (até a data) sei suspende ezekusaun, tanba labele aplika rejime duodesminál, pur enkuantu lei ne’e promulga no publika ona iha Jornál Repúblika.

Iha períodu ne’e to’o agora MF prepara kondisaun atu lansa pakote orsamentu, enkuantu iha janeiru bainhira aplika rejime duodésimu, observasaun MF nian katak nia kapasidade ezekusaun ki’ik liu lato’o porsentu 60, tanba tempu limitadu ba ministériu no instituisaun sira atu halo ezekusaun no labele halo ezekusaun ida liu fali kapasidade rejime duodesimál ne’e rasik.

Enkuantu duodésimu janeiru nian iha montante millaun $71,9 ne’ebé aplika ba saláriu no vensimentu millaun $16,7, bens no servisu servisu millaun $28,9 ho transferénsia públika millaun $26,2 no ida ne’e inklui ona ho fundu dezenvolvimentu kapitál umanu ba fulan ida ne’e distribui millaun $1,316,175.

“Entaun ita espera ho pakote ne’ebé ita sei distribui, ministériu hotu-hotu sei konsentra, sei fó prioridade ba ezekusaun. Pur tantu ita foin iha primeiru trimestre fulan-fevereiru ita fiar katak nia ezekusaun sei la’o tanba sira iha planu ida di’ak ba ezekusaun ida ne’e”.

Jornalista: Maria Auxiliadora

Editora: Rita Almeida

iklan
iklan

Leave a Reply

iklan
error: Content is protected !!