MEJD Hala’o Enkontru Preparasaun Ba Jogu CPLP

0
179
Ministra Edukasaun, Juventude no Desportu, Dulce de Jesus Soares

DILI, (TATOLI) – Ministra Edukasaun, Juventude no Desportu, Dulce de Jesus Soares, no Sekretáriu Estadu Juventude no Desportu, Nélio Isaac Sarmento, hala’o enkontru ho ekipa tékniku akompañamentu hosi Komunidade Nasaun Ko’alia Lian Portugés (CPLP-sigla portugés) kona-ba preparasaun jogu CPLP ba dala XII ne’ebé sei hala’o iha Timor, jullu 2020.

“Ohin ne’e enkontru ho ekipa téknika akompañamentu para sira fahe sira nia esperiénsia bainhira sira sai uma na’in ba jogu ida ne’e no mezmu jogu ne’e hala’o iha tinan 2020 maibé tanba ita sei involve ema lubun ida hosi nasaun CPLP, maka ami hanoin katak di’ak liu ami hahú halo preparasaun agora kedas”, Dulce ba jornalista sira iha salaun enkontru Ministériu Edukasaun, Juventude no Desportu (SEJD), Vila Verde, sesta ne’e.

Nia haktuir modalidade ne’ebé sei partisipa iha jogu ne’e maka Futeból, Voli Praia, Karatedo, Taekwondo, Basket no sel-seluk tan.

“Timor-Leste la’ós de’it iha jogu CPLP maka ita halo preparasaun maibé foin lalais ita partisipa mós iha alta kompetisaun iha tinan 2018 no ita mós sei iha jogu balun iha tinan 2019 entaun ita nia preparasaun la’o hanesan baibain”, Dulce tenik.

Nia hatutan Governu Timor-Leste sei prepara orsamentu natón atu selebra jogu ida ne’e, tanba jogu ida ne’e Timor-Leste tenke hatudu uma na’in ne’ebé di’ak hodi organiza eventu internasionál refere.

“Ha’u garante katak Governu liuhusi SEJD sei iha orsamentu natón para bele selebra jogu ida ne’e. Agora dadaun ami halo hela prosesu ba orsamentu, tanba ami tenke identifika saida-saida de’it ita tenke prepara”, nia haklaken.

Tuir ekipa téknika akompañamentu nia avaliasaun, Dulce afirma, Timor-Leste nia infraestrutura desportu pelumenus disponível ona para bele realize jogu sira ne’e.

“Tinan ida ne’e sai traballu kaza ba Governu liu-liu Ministériu Edukasaun Juventude no Desportu atu bele halo reabilitasaun ba infraestrutura desportu sira para apoiu jogu refere”, haktuir.

Jornalista: Xisto Freitas

Editora: Rita Almeida

HUSIK IDA HATÁN