Lidera Grupu Traballu Jéneru Munisipál, SEII Atribui Kompeténsia Ba Prezidente Autoridade

0
86
Sekretáriu Estadu Igualdade no Inkluzaun, Maria José da Fonseca de Jesus, akompanha husi Diretor Jeral SEII, Armando da Costa, entrega kompetensia ba Prezidente Autoridade Munisípiu sira, hodi lidera Grupu Trabalhu Jéneru Munisipál. Imajen: Julia Chatarina

DILI (TATOLI) – Sekretaria Estadu Igualdade Jéneru no Inkluzaun (SEII) atribui kompeténsia ba Prezidente Autoridade Munisípiu sira ho durasaun tinan lima, hodi lidera Grupu Traballu Jéneru Munisipál atu hatutan servisu governu sentrál ne’ebé halo promosaun igualdade jéneru iha Timor-Leste, bazeia ba Rezolusaun foun nú.35 ne’ebé ezekutivu sira aprova iha tinan 2017.

Sekretáriu Estadu Igualdade no Inkluzaun, Maria José da Fonseca de Jesus hateten durante ne’e Grupu Trabalhu ne’e barak mak sei lidera husi Sekretáriu Munisípiu no bainhira pontu fokal sira ba halo komunikasaun ho parte barak, ema sempre hateten katak pontu fokal hanesan nivel ida ki’ik, nune’e dala ruma susar atu konvoka reuniaun ho parte balun.

“Ita hakarak asegura katak Grupu Trabalhu Jéneru servisu ho di’ak bainhira lidera husi autoridade másima”, tenik ba jornalista sira, ohin iha Caicoli, bainhira partisipa Worshop ne’ebé SEII realiza hamutuk ho UN Woman.

Nia hatutan: “Konteúdu husi rezolusaun (nú.35) ne’e atu fó kompeténsia ba Prezidente Autoridade Munisípiu  hodi lidera Grupu Trabalhu Jéneru nivel munisípiu nian hodi hatutan servisu SEII iha promosaun igualdade jéneru no inkluzaun iha nivel munisípiu, nune’e mós iha nivel munisípiu ba postu administrativu, suku to’o aldeia”.

Governante ne’e mós rekoñese, iha munisípiu sira balun komesa enfrenta obstákulu, tanba ne’e governu iha espetativa mak bainhira grupu ne’e lidera husi autoridade másimu ninian, bele fó sira forsa liu tan atu halo servisu promosaun igualdade jéneru iha nivel munisípiu to’o iha aldeia.

“Iha sesaun workshop ida ne’e, alem de agradese ekipa sira ne’ebé mak servisu dezde uluk to’o agora, halo fali renomeasaun ba ekipa foun, katak fó kompeténsia ba Prezidente Autoridade mak lidera grupu trabalhu jéneru”, katak.

Nune’e mós nia akresenta, parte ministériu mós kontinua fahe informasaun konaba rezolusaun foun no informasaun oin-oin ne’ebé mak liga ho lei kontra violénsia doméstika no dokumentu oin-oin ne’ebé mak uza ba servisu promosaun igualdade jéneru no inkluzaun.

Sekretáriu Munisípiu sira ne’ebé mak antes ne’e lidera grupu, hafoin atribui kompeténsia ne’e ba Autoridade Munisipal, sira nafatin hola parte no koopera nafatin kontinua fó apoiu makas ba ekipa foun ne’ebé sei servisu iha nível munisípiu.

Parte seluk Prezidente Autoridade Munisípiu Baucau, António Agosto Guterres hateten polítika SEII nia iha ona tratamentu balansu ho Dekretu Lei nú.3 2006 ne’ebé define statuta Autoridade Munisipál no Administradór Munisipál.

“Ko’alia konaba Grupu Trabalhu Jéneru, polítika nasionál atu aborda ba assuntu ne’e tenke fiksu, labele ohin tau Sekretáriu Munisipál mak assumi no agora la tuir enkuadramentu legal ba deskonsentrasaun, derrepente fó hikas ba Prezidente Autoridade Munisipál sira tuir enkuadramentu ne’ebé mak iha”, tenik.

Nune’e nia sujere ba futuru tenke kria polítika nasionál ba grupu trabalhu ne’e iha nível nasionál to’o nivel lokál ida de’it para bele assegura orientasaun no polítika la’o iha dalan ne’ebé mak klaru.

Jornalista: Julia Chatarina

 Editór : Manuel Pinto

HUSIK IDA HATÁN