Lere: Autoridade Seguransa-Defeza Firme Defende Estabilidade

0
68
Xefe Estadu Maiór FALINTIL-Forsa Defeza Timor-Leste (F-FDTL), Majór Jenerál Lere Anan Timur.Foto António Goncalves

DILI, (TATOLI) – Xefe Estadu FALINTIL-Forsa Defeza Timor-Leste (F-FDTL), Maiór Jenerál Lere Anan Timur, hateten autoridade seguransa no defeza firme hodi defende estabilidade, tanba ne’e sei tau sees asuntu direitu umanu bainhira halo atuasaun ba konflitu entre arte-marsiál sira.

“Loron hirak liu-ba to’o agora arte-marsiais kuaze ativu loos iha munisípiu Baukau, Likisa no Dili hodi sunu uma, duni malu no oho malu iha ne’ebé halo populasaun pániku. Ha’u hateten ona ba komandante PNTL katak husik sira halo ba no kuandu ita tún, ita tau sees lai direitus umanus ba sorin hodi defende estabilidade”, Lere ba jornalista sira iha Palásiu Prezidente Nicolau Lobato, Bairru Pité, kuarta ne’e hafoin levanta kestaun seguransa nasionál ba Prezidente Repúblika, Francisco Guterres Lú Olo.

Nia konsidera desizaun tribunál mak fraku tebes, tanba antes ne’e autoridade seguransa detein autór konflitu ho evidénsia hanesan arma branka (rama ambon), no atributu arte-marsiál, maibé tribunál liberta tiha fali.

“Hanesan ezemplu, tinan uluk joven ida tá elementu forsa ida iha parte Bekora no autór konsege kapturadu maibé tribunál husik tiha. Ne’e hatudu katak tribunál la koopera ho instituisaun seguransa no defeza”, akresenta.

Nia realsa tribunál ka sé de’it kuandu la ajuda atu mantein estabilidade nasionál, parte seguransa no defeza sei toma medida atu hatan ba situasaun atuál.

Tuir nia konflitu entre elementu arte-marsiál sira ne’e konsideradu krime organizadu, tan ne’e bainhira seguransa ba halo atuasaun, direitu umanu sei labele ko’alia.

“Timor labele kompara ba nasaun dezenvolvidu hanesan Austrália, Amérika no nasaun sira seluk. Timor ne’e oin seluk”, akresenta.

Entretantu, Lere mós husu ba ukun na’in sira atu tau matan ba arte-marsiál sira tuir kompromisu ne’ebé hato’o ona iha kampaña eleitorál.

“Kestaun artes marsiais ne’e ha’u hato’o beibeik maibé laiha resposta. Dalaruma ita-nia ukun na’in sira ne’ebé toma konta ba asuntu ne’e maka (….) no tilun maka (…) ka oinsá? Uluk kampaña ne’e dehan atu tau matan ne’e iha ne’ebé no bainhira?. Bolu líder artes marsiais para tuur hamutuk halo estatutu, ha’u hanoin katak bele rezolve ona problema”, eis lider rezisténsia ne’e afirma.

Iha biban ne’e, Jenerál Lere mós apela ba elementu seguransa no defeza atu labele mete ba arte-marsiál, tanba bainhira mete sei hasai hosi instituisaun.

Jornalista: Xisto Freitas

Editora: Rita Almeida

HUSIK IDA HATÁN