Konstrusaun Aeroportu Internasionál Komoro Hahú Setembru

1
668
Embaixadór Japaun iha Timor-Leste, Hiroshi MINAMI, sorumutu ho Primeiru-Ministru, Taur Matan Ruak, iha Palásiu Governu, ohin. Imajen António Goncalves

DILI, (TATOLI) – Governu planeia hahú konstrusaun ba aeroportu internasionál Nicolau Lobato Komoro iha setembru tinan ne’e, ho apoiu orsamentu hosi Japaun.

“Bainhira akordu iha ona, konstrusaun ne’e hahú iha setembru tinan ne’e, prazu ba konstrusaun ne’e termina iha 2022 atu finaliza aeroportu internasionál”, Ministru Transporte no Komunikasaun, José Agostinho da Silva, ne’ebé akompaña hosi Embaixadór Japaun iha Timor-Leste, Hirosi Minami, no ekipa tékniku bainhira aprezenta dezeñu pre-liminária ba Primeiru-Ministru, Taur Matan Ruak, iha Palásiu Governu, ohin.

Tuir governante, maiu tinan ne’e governu nasaun rua sei estabelese akordu kooperasaun ba projetu ne’e hodi hahú rai-fatuk dahuluk.

Iha sorumutu ne’e, tékniku sira aprezenta kona-ba komponente aeroportu nian hanesan terminál ba pasajeiru sira, torre kontrolu, fatin ba selu impostu, sala saída.

Enkuantu kona-ba komunidade afeitadu hosi área Beto to’o Raikotu ba projetu ne’e, nia hatete Governu sei buka meius hodi fó atendementu ida dignu hodi muda ba fatin seluk.

“Governu Timor-Leste sei buka meius atu halo sosializasaun ba komunidade afeitadu, nune’e konstrusaun realiza iha setembru tinan ne’e”, dehan tan.

Iha biban hanesan, embaixadór Japaun ba Timor-Leste, Hiroshi Minami, hatete ekipa tékniku Japaun antes ne’e halo ona enkontru ho Ministériu Transporte no Komunikasaun no Administrasaun Navegasaun Aérea Timor-Leste (ANATL).

Diplomata ne’e dehan tan mesmu governu Japaun seidauk iha desizaun finál ba montante orsamentu hodi fó apoiu ba konstrusaun ne’e, maibé tuir estimasaun provizóriu hosi tékniku sira sei gastu milliaun $42.

Jornalista: Agapito dos Santos

Editora: Rita Almeida

1 COMMENT

  1. Kria uluk kondisaun ba comunidade sira, tempo sei la to atu kria kondisaun a naunser ganti rugi depois husik sira ba hela iha tasi ka foho ka kunformi sira,, karik nune planu ne ladiak e la justi ba povu nebe nain ba rai ida ne.

HUSIK IDA HATÁN