Heineken-AEMTL Oferese Kioske Ba Feto Kbiit-La’ek Na’in-Hitu

0
134
Benefisiária na'in-hitu foto hamutuk ho Sekretária Estadu ba Igualdade no Inkluzaun, Maria José da Fonseca Monteiro, Prezidente AEMTL, Hergui Lina Fernandes Alves, no Jerente Jerál Heineken, Vinay Mathur hafoin inaugurasaun kioske iha Santa Krus. Foto/AEMTL.

DILI, (TATOLI – Empreza Heineken Timor, S.A, servisu hamutuk ho Asosiasaun Emprezariál Feto Timor-Leste (AEMTL, sigla iha portugés), liuhusi programa corporate social responsibility (CSR) oferese kioske ki’ik no simples ba feto kbiit-la’ek na’in-hitu hodi bele hahú sira-nia negósiu.

Benefisiária sira ne’e maka Maria Sousa Amaral no Maria Dias da Costa husi Hera, Juliana dos Santos Machedo hela iha Aimutin, Elisa Soares dos Reis iha Santa Krús, Carmen Pereira de Jesus husi Kamea-Bekora, Isabel da D. Tilman husi Bekora no Rogaia Babo da Silva husi Tibar.

Benefisiária na’in-hitu ne’e identifikadu husi AEMTL, tanba sira presiza duni tulun atubele hetan rendimentu no independete ekonómikamente hodi sustenta moris loroloron nian.

Prezidente AEMTL, Hergui Lina Fernandes Alves, hatete programa empodera feto iha ekonomia nu’udar programa responsabilidade sosiál husi empreza Heineken Timor S.A dezde 2016 no iha tinan ne’e halo parseria ho AEMTL ho objetivu eleva no ajuda feto maluk sira hodi hadi’a sira-nia vida ekonomia.

Programa ne’e dezeñu atu ajuda feto ho kapasidade ekonomia ne’ebé fraka no laiha serbisu, maibé ka’er responsabilidade boot iha família, tanba oan barak no fó solusaun atu hetan rendimentu ne’ebé sustentavel.

“Atu fó han sira-nia família no haruka oan sira bá eskola, tanba ne’e AEMTL hakarak fó onra ba inan-feton na’in-hitu ne’ebé sai benefisiária tanba ami sente katak sira maka eroína ba sira-nia família”.

Hatutan mezmu sira laiha kapasidade, maibé serbisu maka’as ho kbiit ne’ebé sira iha tenta atu fó han oan sira, eduka no haruka sira bá eskola, ne’e buat ida ne’ebé dalabarak ema larekoñese, maibé ida ne’e maka inan-feton sira ne’e halo kona-ba susar saida maka sira na’in-hitu ne’e halo hodi bele fó han ba família.

Hodi fó onra ba feto vulneravel na’in-hitu ne’e AEMTL mós fó sertifikadu ne’ebé maka atu tau iha sira-nia uma ida-idak ne’ebé iha laran hatete “I’m The Hero Of My Family” ka ha’u mak eroína ba ha’u-nia família.

“Dalabarak ita larona sira-nian istória no dalabarak ita nein hakarak atu hatene, maibé tempu ohin ne’e ita atu rona, atu hatene no rekoñese serbisu boot ne’ebé inan-feton na’in-hitu halo iha sira-nia família”.

Husi benefisiária sira ne’e ida identifikada husi Gabinete Apoiu ba Atividade Konjuge Prezidente Repúblika ne’ebé mak fó mós sasán balun hodi tau iha nia kioske.

“Ami fiar katak se ita investe iha inan ida ita investe iha família ida no ita sei hetan retornu husi futuru oan sira-nian”.

Sobre programa CSR ida ne’e AEMTL ho Heineken sei lahalo de’it iha Dili maibé sei kobre mós iha munisípiu sira seluk no tinan ida sei halo dalarua no kada períodu sei identifika benefisiária ne’ebé lahanesan.

Trajetu ba benefisiáriu sira ne’e iha kada tinan hamutuk ema na’in-12 ne’ebé fahe ba pakote rua no ema na’in-neen ba kada períodu.

Antes entrega kioske ne’e ba benefisiária sira AEMTL kapasita mós sira liuhusi treinamentu báziku ba jestaun negósiu nian nomós membru AEMTL mós prienxe sasán ba kioske feto maluk na’in-hitu ne’e hanesan kontribuisaun hu ne’ebé laiha valór mezmu tempu ne’ebé difisil, mas hanesan kompromisu husi membru sira katak misaun AEMTL mak bele mós haforsa feto maluk sira seluk iha vida ekonomia.

“Tanba ne’e maka maluk sira ida-idak tau sira-nia kontribuisaun para enxe sasán iha kioske sira ne’e, aumezmu tempu ami mós empodera maluk feto sira oinsá maka bele tau presu ba sira-nia sasán no jere sira-nia kioske ne’e bele sai boot liután husi ida ne’ebé maka agora ami hahú”.

Kontratór hitu ne’ebé identifika hodi sai na’in ba projetu, AEMTL mós identifika madriña ba sira na’in-hitu no nia responsabilidade maka akompaña nafatin maluk feto ne’ebe sai benefisiária para sira-nia negósiu labele hotu iha dalan klaran, maibé oinsá atubele kontinua.

Kioske sira ne’e kontroe tanba hetan finansiamentu husi Heineken ba kada kioske kontrui ho montante $1.950 ne’ebé maka AEMTL tenta halo kioske simples ida.

Jerente Jerál Heineken, Vinay Mathur, hatete bainhira hahú inisiativa CSR dezde 2016 ne’e hakarak atu halo buat ida ne’ebé realidade.

“Bainhira haree ba kondisaun Timor-Leste nian iha buat rua ne’ebé ami hetan problema boot rua mak violénsia doméstika no má nutrisaun ba labarik sira. Iha Heineken ami ladún komprende kona-ba ida ne’e, maibé tanba iha organizasaun barak ne’ebé iha Timor-Leste ne’ebé toma konta ba área ida ne’e nian, maibé buat ida ne’ebé Heineken hatene katak bainhira feto maluk sira iha osan mesak, iha nia família sei hetan respeitu depois nia oan sira sei lahamlaha tanba husi feto ne’e bele sustenta nesesidae uma-laran”.

Reprezentante espoza Prezidente Repúblika, Ivete Oliveira, hatutan liafuan husi espoza Prezidente katak ba benefisiária sira, apoia ne’ebé Heineken fó liuhusi AEMTL nu’udar apoiu ida ne’ebé atubele empodera sira nune’e bele hahú.

“Ita hotu nia moris atu hadi’a ita-nia vida ekonomia tanba feto Timór, ita hasoru problema barak, hasoru problema violénsia, ita presiza atu hakore ita-nia án, presiza atu hetan apoiu finanseiru liuhusi inisiativa ekonomia nune’e ita bele hakotu, ita bele deside saida maka di’ak liu ba ita-nia án”.

Nune’e espoza Prezidente Repúblika agradese ba organizasaun ne’ebé laran-luak hodi tulun feto Timór ne’ebé presiza tebes ajuda hodi bele hadi’a sira-nia vida.

Sekretária Estadu ba Igualdade no Inkluzaun, Maria José da Fonseca Monteiro, fiar katak esforsu ne’ebé Heineken ho AEMTL halo ne’e sei fó biban di’ak ba família hitu ne’e atubele hadi’ak moris.

“Sekretária Estadu ba Igualdade no Inkluzaun ba tinan lima oin mai iha programa oioin ne’ebé ami iha atu halo inklui mós hakbiit ekonomia feto sira-nia, la’ós de’it iha área urbana, maibé to’o bá área rurál”.

SEII mós iha tinan rua nia laran servisu hamutuk ho Heinken halo mós inisiativa hanesan, apoia família 12 iha munisípiu Dili no sei kontinua koopera ho empreza ne’e ba tinan sira bá oin.

Iha tinan ne’e SEII identifika ona munisípiu seluk ne’ebé seidauk fó apoiu, indentifika família rua husi munisípiu seluk atubele apoia, tanba Governu ida ne’e hakarak atu asegura la’ós ema ou feto sira ne’ebé hela iha área urbana maka hetan benefísiu husi programa ne’ebé Governu iha atu oferese ba sidadaun sira, maibé tenke lori mós benefísiu sira ne’e bá área rurál.

Sekretária Estadu ne’e konkorda katak feto ne’ebé forte, iha independénsia finanseira bele brani atu foti desizaun ba nia án, ba família no bele forte atu hadi’a nutrisaun ba oan sira nune’e sira bele di’ak liután atu tuir prosesu aprendizajen.

“Feto ne’ebé forte, iha independénsia finanseira, sira bele brani atu hatete la’e ba violénsia saida de’it, atu hatete la’e ba diskriminasaun tanba feto komponente ida forte iha sosiedade, bele sai parseira ida forte ba mane sira atubele kontribui ba ita-nia rai”.

Juliana dos Santos, benefisiária husi programa ne’e agradese tebes ba kompañia Heineken ho AEMTL nia programa ne’ebé di’ak tebes hodi tulun feto vulneravel sira.

“Ha’u tenke haka’as an atu nune’e ha’u-nia negósiu bele la’o bá oin. Ha’u espera ba AEMTL bele ajuda mós feto maluk sira ne’ebé kbiit-la’ek”.

Jornalista: Maria Auxiliadora

Editora: Rita Almeida

HUSIK IDA HATÁN