Hadi’a Aeroportu, Embaixada Japaun Hasoru PN

0
119
Embaixadór Japaun iha Timor-Leste, Hiroshi MINAMI, hafoin sorumutu ho Primeiru-Ministru, Taur Matan Ruak, iha Palásiu Governu, ohin. Imajen António Goncalves

DILI (TATOLI)–Embaixadór Japaun iha Timor-Leste, Hirosi Minami, ho ekipa téknika ohin hasoru malu ho Parlamentu Nasionál (PN), Komisaun D ho E (area temátika dezenvolvimentu ho Infraestrutura) hodi esplika kona ba projetu hadi’a Aeroportu Internasionál Nicolau Lobato.

Konstrusaun Aeroportu ne’e oferese gratuita hosi governu Japaun ba Timor-Leste  ho total orsamentu millaun U$ 45, dolar Amerikanu. Implementasaun ba konstrusaun ne’e sei hahú ho konkordánsia formál iha fulan Maiu tinan 2019, entre governu Timor-Leste ho Governu Japaun, foin loke tender iha Dezembru no konstrusaun sei hahú iha Marsu tinan oin.

Prezidente Komisaun E, trata asuntu Infraestrutura, Abel Pires agradese ba Embaixadór ho nia ekipa tanba bele esplika ona faze preparasaun dezeñu ba konstrusaun aeroportu ba sira.

“Ami agradese no simu embaixadór ho nia ekipa tomak, sira mai ho objetivu atu esplika sira nia apoiu kona-ba halo konstrusaun Aeroportu Internasionál Nicolau Lobato,” Abel Pires hato’o Agradese, hafoin enkontru iha Parlamentu Nasionál, ohin.

Nia dehan tan, embaixadór ho nia ekipa mai aprezenta kona-ba preparativu ba konstrusaun aeroportu, dezeñu ne’e hatudu katak konstrusaun ne’e sei la afeta ba komunidade sira nia uma ne’ebé besik.

Aeroportu sei la muda, sei la taka, prosesu konstrusaun mós sei la halo interrupsaun ba operasaun aviaun nia loroloron tanba fatin halo konstrusaun ne’e ketak inklui komunidade sira ne’ebé besik mós sei la prezudika.

Iha fatin hanesan, Embaixadór Japaun iha Timor-Leste, Hirosi Minami, hateten Governu Japaun ho Timor-Leste sei halo konkordánsia formal iha Maiu tinan ne’e, hafoin halo konstrusaun ba Aeroportu Internasionál Nicolau Lobato.

“Hein katak Governu Japaun ho Governu Timor-Leste bele halo konkordánsia iha fulan Maiu tinan ne’e, hafoin bele hahú konstrusaun Aeroportu Internasionál Nicolau Lobato,” Embaixadór Japaun, Hirosi Minami ba jornalista sira hafoin hasoru malu ho Komisaun D ne’ebé trata ba asuntu Ekonomia no Dezenvolvimentu inklui Komisaun E ne’ebé trata asuntu Infraestrutura, Parlamentu Nasionál, ohin.

Entretantu ekipa téknika ne’ebé akompaña embaixadór kompostu hosi espesialista sira hosi JICA Japaun.

 Jornalista : Zezito Silva

Editór : Manuel Pinto

HUSIK IDA HATÁN