Fulan Ne’e Governu Hahu Ezekuta OJE 2019

0
185
Ministra Finansa em ezersisiu, Sara Lobo Brites. Imajen Egas Cristovão

DILI, (TATOLI) – Ministra Finansa en Ezersísiu, Sara Brites Lobo, hatete governu sei ezekuta Orsamentu Jerál Estadu (OJE) 2019 iha fulan ne’e depois Prezidente Repúblika, Francisco Guterres Lú Olo, promulga lei refere iha loron 7 liubá.

“Dotasaun Orsamentu Temporáriu (DOT) ita uza se-kuandu orsamentu seidauk promulga maibé promulga ona automatikamente ita kansela”, katak membru governu ne’e ba jornalista sira hafoin aprezenta planu ezekusaun OJE 2019 ba Primeiru-Ministru, Taur Matan Ruak, iha Palasíu Governu, ohin.

Ministériu Finansa, nia dehan sei hasai sirkulár ekuzasaun ba ministériu hotu hodi hahú ezekuta iha fulan-ne’e.

Alende ne’e, Governu tenke kansela ezekusaun DOT ba fulan-fevereiru ho montante $94.617.778 ne’ebé konsellu ministru aprova iha semana kotuk hodi hahú konsentra ba ezekusaun OJE 2019.

Antes tama iha prosesu ezekusaun, nia haktuir ministériu halo hela prosesu instalasaun no prepara dekretu ezekusaun para distribui ba ministériu no ajénsia autónoma sira.

“Espera finde semana ne’e bele konklui no semana oin loron 18 loke ona ba ministériu, ajensía autónoma para ezekuta ona sira nia osan”, realsa.

Dekretu Governu ba ezekusaun ne’e hodi regula kada ministériu no institituisaun autónoma tuir planu no programa ne’ebé aprovadu iha Parlamentu Nasionál.

Entretantu, totál DOT ba fevereiru ne’ebé kanseladu fahe ba kategória saláriu no vensimentu $16 milliaun, bens servisu milliaun $26, tranferénsia públika milliaun $18 no kapitál dezenvolvimentu milliaun $32 inklui selu imprestimu hosi Ajénsia Banku Dezenvolvimentu (ADB-sigla inglés) ba konstrusaun estrada iha TL.

Jornalista: Agapito dos Santos

Editora: Rita Almeida

HUSIK IDA HATÁN