DILI, (TATOLI) – Ministru Justisa, Manuel Cárceres da Costa, hatete tribunál pendente kazu barak tanba menus rekursu umanu.
“Iha kazu pendente barak, hosi kazu sira ne’e afeta ba ita nia maluk sira iha prizaun preventiva atu hetan sira nia estatutu loloos”, dehan ministru ba jornalista sira iha ninia knaar fatin Kaikoli, ohin.
Tuir dadus ne’ebé asesu; kazu pendente iha tribunál hamutuk 642 durante 2017 to’o 2018 kompostu hosi krime omesidu, violénsia seksu’al no kazu sivíl seluk.
Governante rekoñese problema ne’e, tanba dadaun tribunál iha juiz hamutuk 33 maibé balun sai ona juiz konselleiru iha tribunál rekursu, prokuradór pur volta 35, defensór públiku 34 no advogado privada 100 resin.
Nia dehan liuhosi konsellu koordenasaun ba justisa; kompostu ministériu justisa rasik, prezidente tribunál rekursu, prokuradór jerál repúblika kontinua komunika hodi buka solusaun ba kestaun ne’e.
“Ohin dader ne’e ha’u koalia via telefone ho prezidente tribunál rekursu atu ami haree situasaun ida ne’e hodi halo kmaan tiha, la’ós atu rezolve hotu, tanba ita nia rekursu umanu la to’o”, realsa liután.
Jornalista: Agapito dos Santos
Editora: Rita Almeida
