Sekretáriu Estadu Ambiente Demétrio de Amaral de Carvalho. Imagen Egas Cristovao

DILI, (TATOLI) – Sekretáriu Estadu Ambiente (SEA), Demétrio do Amaral de Carvalho, halo inspesaun ba projetu estrada husi kompañia China Wuyi, tanba simu reklamasaun husi públiku sobre rai-rahun ne’ebé suar liuliu husi trosu benvindu (selamat datang) Tasi-Tolu ba to’o atividade terminál nian.

“Loron hira ami simu complaint (reklamasaun) katak rai-rahun maka’as, ne’e primeiru. Ida segundu, ami simu husi dive company sira ne’ebé hatete visibilidade iha bee okos, turbiditu bee okos nia ne’e ladún di’ak, tanba sendimentasaun tama iha tasi durante konstrusaun estrada ida ne’e maka’as tebes”, afirma Demétrio iha Tasi-Tolu hafoin inspesaun, ohin.

Sekretáriu Estadu ne’e hatete fatin atrasaun turizmu ida maka’as loos maka ita Tasi-Tolu, ema luku hodi haree ahu-ruin no duut-tasi, fatin ba Karau-Tasi (Dugong), tanba ne’e SEA bá hodi haree bainhira simu kestaun ne’e.

“Karik iha buat ruma ita bele hadi’a, ita hadi’a no ami konsege ko’alia ho enjiñeiru no jerente husi empreza China Wuyi ne’ebé ka’er projetu ida ne’e”, katak.

Sira relata progresu serbisu no kestaun ne’ebé hetan iha kampu ba Project Management Unit (PMU) hanesan entidade ida ne’ebé mós relata sira-nia serbisu ba Ministru Obra Públika.

“Ami sei halo komunikasaun ho PMU atu haree saida maka ita bele mellora iha situasaun ida ne’e karik tenke rega intensivu liu, karik halo korresaun ki’ikoan sira ba sedimentation trap ne’ebé agora dauduan halo hela”, eis deputadu ne’e katak.

Iha inspesaun ne’ebé halo ohin ne’e tanba udan horisehik, entaun lahetan rai-rahun no bee iha tasi okos nia turbidita fo’er loos tanba visibilidade ladún di’ak.

“Ema luku iha tasi okos, hasai fotografia kuandu naroman di’ak ne’e bele halo sai atrasaun ne’ebé di’ak, maibé la’ós tan de’it ema luku, kuandu sendimentasaun ne’e tama maka’as ba tasi ita-nia ahu-ruin, du’ut-tasi sira sei mate, ita-nia espésie boot sira hanesan Dugong mós sei bele dezaparese iha fatin ne’e”.

Tanba ne’e SEA sei kovida dirijente sira husi PMU atu fahe rezultadu ne’ebé hetan iha terrenu ba sira atu PMU fó orientasaun iha implementasaun projetu ne’e iha kampu hodi mellora kestaun ambientál ne’ebé públiku reklama.

Relasiona ho preokupasaun públiku nian, Asistente ba Ambiente no Seguransa ba Saúde empreza China Wuyi, Andre Sarmento, hatete ida ne’e parte kruziál ida atu kompañia tau atensaun tanba bainhira rai-rahun maka’as liu no afeta husi movimentu transporte sira no liga ba atividade projetu maka nu’udar empreza iha atensaun másima oinsá atu prevene ida ne’e atu labele fó impaktu ba komunidade no utilizadór dalan ne’e.

“Ami prepara ona karreta boot rua ne’ebé maka fó asisténsia ba dalan ne’e, loroloron sira tenke rega dala-haat hahú husi tuku sia to’o tuku haat loraik, maibé depende fali ba tempu kuandu loron manas rega dala-haat, kuandu udan dalaruma ami rega, udan dadeer to’o loraik ami larega”.

Tuir planu projetu konstrusaun estrada Tasi-Tolu bá to’o Tibar ne’e hahú iha 28 fevereiru 2017 no sei remata iha 15 juñu 2019.

Jornalista: Maria Auxiliadora

Editora: Rita Almeida

HAKEREK NO HATÁN

Please enter your comment!
Please enter your name here