iklan

INTERNASIONÁL, EDUKASAUN, POLÍTIKA

TL Kontinua Esplora Kooperasaun Ho Kuba

TL Kontinua Esplora Kooperasaun Ho Kuba

Embaixadór Timor-Leste iha Kuba, Loro Horta, hasoru Primeiru-Ministru, Taur Matan Ruak, iha Palásiu Governu, tersa, (26/2/2019). Imajen António Goncalves

DILI, (TATOLI) – Estadu Timor-Leste liuhosi ninia diplomata iha Kuba, Loro Horta, sei buka oportunidade hodi kontinua estabelese kooperasaun ho nasaun Kuba, liuliu iha área saúde, agrikultura, protesaun sivíl, meterolojia tuir nesesidade governu hodi aselera dezenvolvimentu nasaun.

Embaixadór Timor-Leste iha Kuba, Loro Horta, ko’alia ba jornalista sira hafoin hasoru Primeiru-Ministru, Taur Matan Ruak, iha Palásiu Governu, tersa, (26/2/2019). Imajen António Goncalves

Embaixadór Timor-Leste ba Kuba, Loro Horta, bainhira relata situasun pólitika, ekonómia no situasaun bolseiru timoroan iha Kuba ba Primeiru-Ministru, Taur Matan Ruak, iha Palasíu Governu, ohin.

Estadu rai rua durante tinan 10 resin estabelese ona kooperasaun iha área lubuk ida hanesan saúde, edukasaun, agrikultura, aeroportu, teknolojia, indústria farmasia no medisina.

Maibé diplomata foinsae ne’e iha prioridade hanesan reforsa kooperasaun iha área saúde, agrikultura bainhira hetan fiar hosi Taur Matan Ruak, momentu sei Prezidente Repúblika, iha 2016.

Área rua ne’e maka indústria farmasia, Timor-Leste bele sosa aimoruk hosi Kuba ho razaun folin baratu no kualidade, Kuba mós iha indústria kímika ba dezenvolvimentu setór agrikultura ho kualidade di’ak.

Nune’e mós husu ba Governu atu haruka timoroan estudante iha área veterinária, protesaun sivíl.

Kona-ba situasaun bolseiru iha Kuba, embaixadór ne’e hatete atraza maka orsamentu ba bolseiru sira hodi difikulta prosesu aprendizajen durante tinan rua. Situasuan ne’e akontese relasiona ho polítika rai-laran.

Maibé Loro Horta espera tinan ne’e prosesu tranferénsia sei la’o di’ak hodi apoiu prosesu aprendizajen.

Tinan 2019, Timor-Leste sei kompleta numéru mediku rihun ida hodi estuda iha Kuba tuir kooperasaun entre nasuan rua ne’ebé asina hosi Fidel Castro no Xanana Gusmão iha 2001.

Estudante medisina timoroan ne’ebé estuda ona iha Kuba to’o ohin hamutuk ema 960 no tinan ne’e sei kompleta ba rihun ida.

Enkuantu, timoroan medisina grupu tolu maka oras ne’e estuda iha Kuba hanesan medisina no espesialista hosi ministériu saúde hamutuk ema 27, medisina no espesialista hosi Universidade Nasionál Timor Lorosa’e hamutuk nain sia no estudante pedagójika hosi ministériu edukasaun hamutuk 25.

Hosi totál estudante ne’e maioria hetan valór aas iha tinan 2018, liuliu bolseiru hosi ministériu saúde ne’ebé estuda iha área medisina no espesialista ho pedagójika hosi ministériu edukasaun.

Jornalista: Agapito dos Santos

Editora: Rita Almeida

iklan
iklan

Leave a Reply

iklan
error: Content is protected !!