DILI, (TATOLI) – Ministru Negósiu Estranjeiru no Kooperasaun (MNEK), Dionísio Babo Soares, akompañadu husi Adjuntu Ordenadór Nasionál, Ivo Valente, enkontru ho Hon Premila Kumar nu’udar Ministra Indústria, Komérsiu, Turizmu, Governu Lokál no Dezenvolvimentu Komunitáriu husi Fiji no Hon Richard Maru nu’udar Ministru Planeamentu no Monitorizasaun Nasionál hosi Papua-Giné Foun.
Fiji no Papua-Giné Foun nu’udár reprezentante ba Fundu Europeu iha Pasífiku, ámbitu COTONOU AGREEMENT.
“Enkontru ne’e atu hato’o Timor-Leste nia ponto de vista kona-ba prioridade dezenvolvimentu Timor-Leste nian no husu atu oinsá prioridade dezenvolvimentu Timor-Leste nian nia reprezenta mós iha estrutura fundu europeu ba pasífiku”, haktuir komunikadu MNEK ba TATOLI, tersa (26/2).
Timor-Leste nia dezenvolvimentu tau importánsia iha pilar lima hanesan Boa Governasaun, Edukasaun no Kapitál Umanu, Infraestrutura, Redusaun Pobreza no Dezenvolvimentu Ekonomia ne’ebé tenke alkansa nia objetivu iha 2030.
Importánsia sira ne’e tuir planu dezenvolvimentu nasionál, maibé tanba estrutura Fundu Europeu tau liu importánsia ba asuntu transversál, nune’e nu’udár Ordenadór Nasionál (NAO-sigla inglés) iha MNEK tau importansia espesifíka ba aréa hanesan Edukasaun, Boa Governasaun, Fortalesimentu Institusionál no dezenvolvimentu rurál iha ámbitu POST COTONOU.
MNEK husu atu iha estruturasaun fundu ba asentua iha pilar koresponde ba interesse dezenvolvimentu TL nian ne’ebé hakerek ona iha Planu Estratéjiku Dezenvolvimentu Nasionál (PEDN) 2020-2013.
Notísia relevante; http://www.tatoli.tl/2019/02/mnek-reprezenta-xefe-estadu-partisipa-reuniaun-nivel-aas-iha-samoa/?fbclid=IwAR1vp3Ex0B8825oD7lkfPiWzLmN5KR6ETVMQbdbZE9EM8yMhMyleeBMOYTM
Jornalista: Rafy Belo
Editora: Rita Almeida
