DILI, (TATOLI) – Ministru Negósiu Estranjeiru no Kooperasaun (MNEK), Dionísio Babo Soares, nu’udar enviadu espesiál husi Prezidente Repúblika, Francisco Guterres Lú-OLo, sei partisipa reuniaun nivel aas entre lider pasífiku nian ho Uniaun Europeia (EU) kona-ba futuru kooperasaun parte rua, bainhira akordu Cotonu ramata iha 2020.
“Reuniaun ne’e sei hala’o iha Apia, Samoa, iha loron 26 fevereiru 2019”, refere komunikadu MNEK ba TATOLI, ohin.
Tuir komunikadu MNEK sei akompaña husi Embaixadór Timor-Leste ba Bélgica no Uniaun Europeia, Francisco Cepeda, Adjuntu Ordenadór Nasionál, Ivo Valente, Diretór Interinu ba Organizasaun Rejionál, Fulgêncio Corbafo no ofisiál husi Protókolu no mídia.
Iha okaziaun hanesan, sei iha mós eventu ida kona-ba lansamentu inisiativa ida ho naran spotlight, hanesan parseria mundiál entre Uniaun Europeia no Nasaun Unida sira atu halakon violénsia ho forma oioin kontra feto sira.
Molok Reuniaun Nivél Aas, sei iha Reuniaun Preparatóriu Ofisiál Seniór ACP Pasífiku nian, iha loron 25 Fevereiru 2019, hodi diskute pontu situasaun negosiasaun Akordu Cotonu depois 2020, nomós prioridade rejiaun Pasífiku nian ne’ebé inklui iha negosiasaun ne’e.
Iha Reuniaun Nivél Aas, lider sira husi ACP Pasífiku no Uniaun Europeia sei halo konsulta polítika atu halo avaliasaun ba progresu negosiasaun kona-ba Akordu Cotonu depois 2020, no atu garante katak preokupasaun no prioridade rejiaun pasífiku nian hetan konsiderasaun.
Eventu ne’e hanesan oportunidade ida ba nasaun sira iha rejiaun Pasífiku inklui Timor-Leste ne’ebé Uniaun Europeia kategoriza tama iha rejiaun pasífiku ne’ebé benefisia husi Fundu Desenvolvimentu Europeu (FED) atu diskute di’ak liutan pontu situasaun negosiasaun Cotonou depois 2020 entre ACP Pasífiku ho Unian Europeia, nomós kontinua servisu iha parseria ba apoia dezenvolvimentu sustentávél no objetivu ne’ebé parte rua partilla hamutuk.
Ministru no delegasaun sei fila hikas mai Dili iha loron 3 marsu 2019.
Jornalista: Rafy Belo
Editora: Rita Almeida
