Prezidente KFP, Faustino Cardoso ho ninia ekipa sorumutu ho SEKOMS iha Palásiu Governu. Imajen Egas Cristovão

DILI, (TATOLI) – Prezidente Komisaun Funsaun Públika (KFP), Faustino Cardoso, ohin ho ekipa enkontru ho Sekretáriu Estadu Komunikasaun Sosiál, Mericio Juvenal dos Reis Akara, hodi buka solusaun ba patrimóniu Estadu hanesan kareta no motor ne’ebé funsionáriu destakadu sira seidauk entrega antes termina servisu iha Radiu Televizaun Timor-Leste Empreza Públika.

Totál funsionáriu 100 resin ne’e balun to’o ohin seidauk entrega transporte ne’ebé uza durante servisu iha empreza públika, tanba ne’e Prezidente KFP ne’e hatete buka atu rezolve hodi asegura identidade pesoál funsionáriu sira ba transporte Estadu ne’e.

Ho kestaun ne’e maka KFP buka koordenasaun ho SEKOMS, RTTL,EP no patrimóniu Estadu atu rekolla hikas transporte no ekipamentu ne’ebé funsionáriu destakadu seidauk entrega.

“Patrimóniu Estadu hanesan motor, kareta, kamera, komputadór no seluktan ne’ebé uluk instituisaun atribui ba pesoál sira uza ba halo kna’ar entaun prosesu ida ne’e tenke tuntas ho sesasaun destakamentu ho nune’e nia sente livre hosi responsabilizasaun no nia dignidade la afetadu, tanba prosesu ida ke la’o ho di’ak”, dehan nia ba jornalista sira iha Palásiu Governu, ohin.

Enkontru ne’e konsege estabelese ekipa integradu ida kompostu hosi SEKOMS, KFP, patrimóniu Estadu no RTTL,EP atu rekolla patrimóniu Estadu hosi funsionáriu destakadu iha tempu besik.

“Atu hotu iha kompromisu, katak prosesu ne’e tenke la’o ho di’ak hodi asegura dignidade pesoál no integridade instituisaun”, tenik tan.

Maibé tuir Prezidente KFP hatete seidauk rejista númeru patrimóniu Estadu hira maka pesoál sira seidauk entrega.

Jornalista: Agapito dos Santos

Editora: Rita Almeida

HAKEREK NO HATÁN

Please enter your comment!
Please enter your name here