Sekretáriu Estadu Komunikasaun Sosiál, (SEKOMS), Merício Juvenal dos Reis Akara, loke semináriu atu halibur hanoin no asaun anuál hodi ezekuta orsamentu tuir planu asaun ne’ebé trasa ona ba fulan tolu, neen no tinan tomak, iha Tibar. Imajen Egas Cristovão

DILI, (TATOLI) – Sekretariu Estadu Komunikasaun Sosiál, (SEKOMS) ne’ebé tutela ba Ministériu Reforma Lejizlativa no Asuntu Parlamentár (MRLAP), ohin hala’o semináriu durante loron rua hahú 21 to’o 22 fevereiru hodi diskute kona-ba planu asaun anuál no ezekusaun Orsamentu Jerál Estadu (OJE) 2019.

Sekretáriu Estadu Komunikasaun Sosiál, (SEKOMS), Merício Juvenal dos Reis Akara, hatete, semináriu ne’e atu halibur hanoin no asaun anuál hodi ezekuta orsamentu tuir planu asaun ne’ebé trasa ona ba fulan tolu, neen no tinan tomak.

“Sira mós sei diskute jestaun no rekursu umanu ne’ebe maka atu ezekuta orsamentu, inklui planu ezekusaun hosi RTTL,ep no Ajénsia TATOLI”, dehan governante ne’e ba TATOLI iha sentru formasaun Tibar, munisípiu Likisa, ohin.

Enkuantu ba SEKOMS no MRLAP tinan ne’e sei fó prioridade ba reforma lejizlativa no liliu ba SEKOMS sei kria lei radiu divuzaun, hadi’a estatutu RTTL,ep.

Liga ba programa, SEKOMS sei estabelese programa ida naran sentru informasaun iha área rurál ne’ebé sei iha koopersaun entre SEKOMS ho Radiu Komunidade, RTTL,ep hodi divulga informasaun hosi baze to’o nasionál, nune’e mós nasionál to’o rurál.

Superiór sira ne’ebé tutela ba SEKOMS, ohin partisipa ativu iha semináriu planu asaun anuál hodi ezekuta OJE 2019 iha Tibar, ohin. Imajen Egas Cristovão

Programa ida seluk maka atu desimina programa governativa da-ualu ho kooperasaun mídia sira, tanba ne’e sei estabelese akordu ho mídia públiku hanesan RTTL,ep no privadu sira liuhosi públikasaun informasaun ba povu liuhosi programa governu ko’alia no programa haree rasik ne’ebé prodús hosi SEKOMS.

Iha okaziaun ne’e Mericío Akara husu ba diresaun hotu inklui RTTL,ep no TATOLI atu ezekuta orsamentu tuir prioridade ho responsabilidade hodi garante tranparánsia ezekusaun hodi dezenvolve setór komunikasaun.

Nia husu ba diretór nasionál no xefe departementu sira maka tenke lidera prosesu ezekusaun no sei hetan akompañamentu hosi gabinete asesória atu servisu ho UPMA (Unidade Planeamentu, Monitorizasaun no Avaliasaun (UPMA), hodi garante susesu ezekusaun OJE iha SEKOMS.

“Ezekuta tuir regra, lei no tuir orsamentu ne’ebé prevee, maibé tenke garante kualidade ezekusaun hodi hetan rezultadu di’ak”, tenik tan.

Total orsamentu ba SEKOMS hamutuk milliaun $5 ne’ebe aloka ba RTTL,ep hamutuk milliaun $1.6 no restu ba TATOLI no SEKOMS.

Jornalista: Agapito dos Santos

Editora: Rita Almeida

HAKEREK NO HATÁN

Please enter your comment!
Please enter your name here