Governadór Banku Sentrál Timor-Leste (BSTL), Abraão de Vasconselos. Foto Tatoli/António Gonçalves.

DILI, (TATOLI) – Banku komersiál tolu hanesan Banku Mandiri, Banku Nasionál Ultramarinu (BNU) Timor no Banku Nasionál Komersiál Timor-Leste (BNCTL, sigla portugés) espresa ona sira-nia interese hodi servisu hamutuk ho Banku Sentrál Timor-Leste (BCTL, sigla portugés) atu implementa Sistema Garantia Kréditu ne’ebé Governu introdús iha 2017.

Liuhusi sesaun traballu ne’ebé organiza husi BSTL ohin ne’e banku komersiál tolu ne’e halo diskusaun no preparasaun téknika hamutuk ba implementasaun Sistema Garantia Kréditu ne’e.

“Diskusaun agora ne’e preparasaun tékniku ona, pergunta sira kona-ba kestaun polítika balu, mas natureza husi diskusaun ne’e preparasaun téknika oinsá atu implementa”, Governadór BSTL, Abraão de Vasconselos, afirma iha JL Vila Fatuhada, ohin.

Tanba ne’e maka iha diskusaun ne’e ko’alia sobre setór atividade ekonómika no sistema dijitál ne’ebé utiliza atu fasilita prosesu.

“Banku sira bázikamente mai rona esklaresimetu husi Banku Sentrál, esplika espetativa Banku Sentrál nian maka oinsá? Aumezmu tempu Banku Sentrál uza oportunidade atu esplika prosesu detallu halo oinsá maka sira tenke halo para implementasaun ne’e tuir regra ne’ebé maka estabelese ona”.

Bainhira prosesu konsulta ne’e hotu, regulamentu públika ona iha Jornál Repúblika entaun banku sira ne’ebé preparadu no iha aplikasaun kréditu ruma nia kondisaun prienxe rekizitu rejime lejibilidade iha dekretu lei ho regulamentu BCTL nian, banku komersiál bele ona haruka aplikasaun katak ami hakarak kréditu ida ne’e bele hetan garantia husi sistema garantia.

“Kuandu ida ne’e publika ona, bele fulan oin, semana oin depois publikasaun Jornál Repúblika, kualkér tempu banku komersiál sira bele hahú ona. Karik agora ema ruma hatama kréditu iha ne’ebá, iha setór sira ne’ebé maka elejivel tuir dekretu lei ho regulamentu Banku Sentrál, nia prienxe rekizitu sira iha ne’ebá hanesan pekena ka média empreza, nia monu iha kategoria sira ne’ebá imediatamente bele asesu ba sistema garantia”.

Hatutan sobre Sitema Garantia Kréditu ne’e, ezersísiu ne’ebé presiza halo maka oinsá kompartilla informasaun sira ne’e ba ita-nia empreza ki’ik no média sira tanba iha rekizitu lubuk ida maka pekena no média empreza presiza entende kona-ba ne’e.

Tanba ne’e BCTL prepara hela atu kolabora ho Kámara Komérsiu Indústria Timor-Leste (CCI-TL, sigla portugés) oinsá atu kanaliza informasaun sira ne’e ba membru sira ou la’ós membru tanba trajetu ida ne’e ba empreza sira ki’ik ho média.

Ida ne’e hanesan programa ida iha ajenda BCTL atu vizita rejiaun sira iha Timór ne’e para halo aprezentasaun oinsá sistema ne’e funsiona, se hatama aplikasaun karik oinsá?

Ba sistema ne’e BCTL lalimita montante husi kréditu ne’e tanba ladefine no ida ne’e banku komersiál sira-nia, mas Banku Sentrál define nia kréditu másimu, ezemplu, aplikasaun kréditu ida ba kompañia ida ou totál agregadu husi kandidatura haat, lima ba atividade keta-ketak ne’e nia montante labele ultrapasa rihun $150.

Orsamentu ne’ebé aprova ona ba Sitema Garantia Kréditu ne’e hamtutuk milliaun $4 ho objetivu atu diversifika ekonomia.

“Milliaun haat kuandu implementasaun la’o di’ak iha primeiru semestre ne’e karik iha diskusaun orsamentu tuir fali mai ha’u iha serteza karik iha proposta ruma ba ne’ebá, Governu, Parlamentu Nasionál bele hasa’e nia montante”.

Iha sesaun traballu ne’e partispia husi Prezidente Konsellu Administrasaun BNCTL, Vise-diretora jerál adjunta BNU Timor, Vise-Diretór Jerál husi Banku Mandiri ho sira-nia ofisiál seniór sira ne’ebé responsabiliza iha área kréditu  nian.

Jornalista: Maria Auxiliadora

Editora: Rita Almeida

HAKEREK NO HATÁN

Please enter your comment!
Please enter your name here