Ministra Finansa em ezersisiu, Sara Lobo Brites. Imajen Egas Cristovão

DILI, (TATOLI) – Rezolusaun Governu kona-ba regra no kritéria selesaun, jestaun no avaliasaun investimentu efetuadu husi Fundu Petrolíferu (FP) hetan ona aprovasaun husi Konsellu Ministru (KM) ne’ebé maka aprezenta husi Ministra Finansa en ezerísiu, Sara Lobo Brites.

Ministra Finansa en ezersísiu, Sara Lobo Brites, hatete rezolusaun ne’e aprova regra no kritéria ba investimentu ida ne’ebé maka Governu deside ona atu halo.

“Ida sosa asaun ne’e, pur tantu tuir lei Fundu Petrolíferu Ministériu Finansa tenke aprova regra no kritéria, publika depois aprezenta mai Parlamentu Nasionál (PN), entaun aban sei ajenda ba parlamentu kona-ba ida ne’e”, Sara afirma hafoin halo audiénsia ho komisaun C PN, ohin.

Hatutan investimentu ida atu sosa asaun ne’e hodi bainhira tau iha Orsamentu Jerál Estadu (OJE) 2019, depois hasai tiha husi ne’ebá no agora tenke prosesa osan ida seluk ne’ebé maka foti diretamente husi Fundu Mina-rai hodi bá sosa asaun ne’e.

Atubele foti osan diretamente iha fundu ne’e maka Konsellu Ministru ohin aprova ona kritéria no regra sira ne’e.

“Tanba foin daudaun Lei Atividade Petrolífera iha revizaun, iha artigu 22 númeru 6 define klaru katak Fundu Petrolíferu bele investe ba iha atividade petrolífera liuhusi Timor Gap”, katak.

Kona-ba Fundu Petrolíferu, Ministériu Finansa mak reprezenta Governu no Banku Sentrál Timor-Leste maka hanesan jestór operasionál.

“Nia prosesu maka aprova hotu tiha lai regra depois aprezenta ba Parlamentu para hetan apresiasaun depois maka sei estabelese protokolu entre Banku Sentrál ho Timor Gap para bele implementa nia transferénsia”.

Tuir lei, Ministériu Finansa iha obrigasaun atu aprezenta, fó hatene ba PN sobre karteira ida ne’e.

Jornalista: Maria Auxiliadora

Editora: Rita Almeida

HAKEREK NO HATÁN

Please enter your comment!
Please enter your name here