DILI, (TATOLI) – Governu liuhosi Primeiru-Ministru, Taur Matan Ruak, hakerek karta ba meza Parlamentu Nasionál hodi husu ajenda aprezentasaun fundu petrolífeu inklui sosa asaun ConocoPhillips no Shell ho montante milliaun $650.
“Agradese no rekoñese disponibilidade Parlamentu Nasionál para ajenda aprezentasaun iha loron 21 fevereiru 2019”, refere karta Xefe Governu ne’ebé lee husi Vise-Sekretária, Isabel Maria Ximenes, iha plenária, ohin.
Tuir karta ne’e, solisitasaun ajendamentu aprezentasaun prevista iha lei númeru 5 artigu 14 husi lei númeru 5/2005 3 agostu republikada husi lei númeru 12/2011 21 setembru kona-ba fundu petrolíferu.
Antes ne’e, Prezidente PN, Arão Noe, hateten prosesu sosa asaun hanesan ajenda ne’ebé orgaun lejislativa ne’e hein hela
“Ida ne’e asuntu ne’ebé parlamentu hein hela, tuir lei hatete kuandu investimentu liga ba setór ekonómiku, liu-liu ba investimentu ida, entaun governu tenke informa ba parlamentu nasionál”, tenik iha segunda ne’e.
Nia hatutan tan: “Tanba ne’e mak ita hein, sei lalais di’ak liu para governu bele mai informa ba parlamentu atu bele halo levantamentu ona ba jestór prinsipál Banku Sentrál Timor-Leste (BCTL-sigla portugés) bele halo ona levantamentu milliaun $650 hodi hola assaun rua ne’ebé mak kompremetidu ona”.
Iha loron 27 setembru 2018 reprezentante espesiál governu, Kay Rala Xanana Gusmão, asina akordu ida ho empreza petrolífera Conocophillips kona-ba partisipasaun iha join venture porsentu 30 ho valor milliaun $350.
Hafoin loron tuir mai, reprezentante espesiál governu ho empreza petrolífera Shell, asina tan akordu sosa no faan partisipasaun asaun empreza ne’e porsentu 26,6 ho montante milliaun $300.
Parseiru join venture Greater Sunrise nia mak Woodside (operadora) ho partispasaun porsentu 33,4, Conocophillips porsentu 30, Shell posentu 26,6 no Osaka Gas porsentu 10.
Nune’e, bainhira Estadu Timor-Leste halo ona pagamentu ba akordu rua ne’e, partisipasaun Estadu hamutuk porsentu 56,6 iha konsórsiu esplorasaun mina iha kampu Greater Sunrise.
Bazea audisaun reprezentante espesiál governu iha loron 6 novembru ho komisaun PN, hetan informasaun katak Estadu Timor-Leste tenke halo pagamentu antes marsu 2019, maibé sei kuandu to’o marsu mak seidauk iha pagamentu mak sei iha multa.
Jornalista: Julia Chatarina
Editora: Rita Almeida
