Tékniku sosiál sira partisipa workshop Inkluzaun Defisiente. Foto TATOLI: Egas Cristovão

DILI, (TATOLI) – Ministériu Solidariedade Sosiál no Inkluzaun (MSSI) realiza workshop  ka treinamentu nasionál kona-ba inkluzaun defisiénsia ba tékniku sosiál MSSI nian iha edifísiu MSSI Kaikoli, ohin ho faze daruak.

Faze primeiru hahú ohin to’o tersa (19/2) no faze daruak nian, iha segunda to’o tersa (26/2).


Ofisiál Protesaun Labarik, Lorenço Barbosa

Objetivu husi atividade ne’e mak reforsa koñesimentu no kapasidade tékniku sira nian hodi halo atendimentu ba ema ho kondisaun defisiente.

Ofisiál Protesaun Labarik, Lorenço Barbosa, husi Munisípiu Ainaro haktuir ba jornalista sira katak workshop ne’e abertura diretamente husi ministra MSSI, Armanda Berta.

“Importante husi sua exelénsia mak kona-ba prezensa tékniku sosiál sira husi kada postu sira ne’ebé mak mai iha fatin ne’e (MSSI-red) inklui parseiru sira ho objetivu halo atendimentu ba komunidade, liliu ba ema defisiente sira iha baze, husi nivel postu to’o ba suku no aldeia”; hateten Ofisiál, Lorenço Barbosa, iha edifísiu MSSI, ohin.

Diretór Ezekutivu Asosiasaun Defisiente Timor-Leste (ADTL), Cesário da Silva, ba jornalista sira iha Otel Timor, antes ne’e, hateten feto ho defisiénsia dalabarak hetan violénsia bazea ba jéneru, feto ho defisiénsia ne’e dupla tanba sira-nia kondisaun kompara ho feto seluk.

Nia mós konfirma katak dadaun ne’e ADTL advoka hela ba sosiedade atu bele halo tratamentu ne’ebé hanesan ba ema ho kondisaun defisiente, liliu mós ba feto ho defisiente sira.

“Dalabarak liu ema haree asuntu defisiénsia ne’e, asosiasaun ne’ebé serbisu ho defisiente ne’e nia problema rasik. Liga ba governu, dehan ne’e Ministériu Solidariedade no Inkluzaun Sosiál nia problema. Ideia ne’e laloos. Persepetiva ida ne’ebé laloos”.

Jornalista: Rafy Belo

Editora: Rita Almeida

HAKEREK NO HATÁN

Please enter your comment!
Please enter your name here