Ministru Negosiu Estranjeiru no Kooperasaun, Dionísio da Costa Babo Soares, hamutuk ho embaixadór Uniaun Europea iha Timor-Leste, Alexandre Leitão. Imajen Egas Cristovão

DILI, (TATOLI) – Uniaun Europeia (UE) apoiu osan ho valór mill €215 ba Timor-Leste (TL) liuhosi asina akordu, entre Ministru Negósiu Estranjeiru no Kooperasaun, Díonisio Babo Soares, ho Embaixadór Uniaun Europeia iha Timor-Leste, Alexandre Leitão, ho objetivu reforsa kapasidade institusionál ba jestaun ne’ebé efisiénte ba kooperasaun rejionál ho asaun reál iha nivél nasionál.

Apoiu ne’e fasilita partisipasaun TL nian iha prosesu foti desizaun, nune’e mós atu asegura ezekusaun ba projetu hirak ne’ebé formula ona iha ámbitu 110 Fundu Europeu Dezenvolvimentu (FED).

“Asinatura akordu ne’e, entre kooperasaun PALOP-Timor-Leste ho Uniaun Europeia iha ámbitu 110 europeu ba dezenvolvimentu hodi reforsa kapasidade institusionál Timor-Leste nian iha jestaun no konsolida kooperasaun rejionál”, Díonisio Babo Soares liuhosi nia diskursu iha ámbitu asina akordu, MNEK, Praia dos Coqeiros, ohin.

Díonisio akresenta projetu ne’e finansia hosi UE ho valór osan mill €215 (besik mill 247 dolar) ho objetivu espesífiku maka konsolida estrutura téknika ba Servisu Ordenadór Nasionál Timor-Leste nian, inklui fasilita partisipasaun servisu ordenadór Nasionál iha atividade rejionál ho nasaun afrika sira ne’ebé ko’alia lian portugés (PALOP-TL).

Diplomata ne’e dehan UE hanesan parseiru maiór iha multilaterál ba dezenvolvimentu Timor-Leste nian.

Relasaun ida ne’e mai hosi esforsu konjuntu hodi asegura valór nasionál kona-ba konstrusaun demokásia hodi salva guarda direitu ema nian no konsolida pás.

Nune’e, TL demonstra vontade servisu ho espiritu kolaborativu ho UE ba realizasaun iha área polítika no dezenvolvimentu, tantu iha nasionál no rejionál.

Parte seluk, Embaixadór UE iha TL, Alexadre Leitão, akresenta projetu ne’e finansia hosi UE, reprezenta kazu ida ne’ebé susesu ba kooperasaun, iha ámbitu finansia inisiativa sira iha área oioin hanesan saúde, governasaun di’ak, Estadu direitu no formasaun profesionál.

PALOP-TL ne’e bazea ba relasaun istóriku no kulturál entre nasaun CPLP sira, nune’e mós iha vínsula komum ne’ebé sira faze atu karateriza sistema governasaun, kuadru legál, administrasaun públika no sistema justisa.

“H’u mós hakarak fó hanoin fali kona-ba inisiativa ida ne’ebé foin remata ho susesu ho alargamentu ba emisaun billete identidade iha munisípiu hotu ne’ebé promove hodi hadi’a kualidade moris sidadaun timoroan, ho esforsu kapasidade tékniku no institusionál hosi servisu ordenadór nasionál, no sei iha kbiit atu partisipa iha prosesu ba koordenasaun rejionál ho nasaun lusófonu sira seluk”, dehan Embaixadór, Alexandre Leitão.

Entretantu, projetu kooperasaun PALOP-TL iha tinan 2017 komemora tinan 25 ba nia ezisténsia ho vizaun promove relasaun ne’ebé eziste liuhosi interkámbiu ba koñesimentu espesializada no prátika di’ak sira, nun’e mós  hametin kooperasaun iha área sira ne’ebé espesífiku ho interese komum, no lian portugés lori valór ida ne’ebé akresentadu espesiál.

Servisu ordenadór Nasionál ba PALOP-TL hanesan responsavél ba ezekusaun projetu ne’e, sei koordena hamutuk ho Mozambique no iha sinerjia ho prioridade sira seluk iha nivél nasionál.

Projeto PALOP-TL/União Europeia ne’e, atu hametin Kooperação entre Angola, Cabo Verde, Guiné-Bissau, Mozambique, São Tomé e Príncipe no Timor-Leste, hanesan país sira ne’ebé iha identidade forte iha polítika kulturál, istórika no linguístika, nune’e mós ho administrasaun públika ne’ebé similár.

Jornalista: Zezito Silva

Editora: Rita Almeida

HAKEREK NO HATÁN

Please enter your comment!
Please enter your name here