Xefe Estadu Maiór FALINTIL-Forsa Defeza Timor-Leste (F-FDTL), Majór Jenerál Lere Anan Timur.Foto António Goncalves

DILI, (TATOLI) – Xefe Estadu Maior Jenerál FALINTIL-Forsa Defeza Timor-Leste (F-FDTL), Lere Anan Timur, husu ba Trinunál atu koopera ho parte Polísia Nasionál Timor-Leste (PNTL).

“Krime sira ne’ebé akontese, ha’u hateten fila-fila ona katak Tribunál tenke koopera ho ajente seguransa. Ha’u husu ba Tribunál, elementu arte-marsiál ne’ebé polísia kaptura lori ba Tribunál ne’e na’in hira maka ba kadeia ona”, Lere ba jornalista sira iha Palásiu Prezidente Nicolau Lobato, Bairru Pité, kuarta ne’e hafoin relata situasaun seguransa rai-laran ba Prezidente Repúblika, Francisco Guterres Lú Olo.

Tuir nia la’en ida basa ninia feen sulan ba kadeia to’o tinan ba tinan, maibé elementu arte-marsiál ne’ebé estraga ema nia vida ho rama ambon, baku ema no sunu ema nia uma maibé la ba kadeia.

“Ne’e katak Tribunál la koopera no bele diskonfia ema balun iha Tribunál fasparte ba arte-marsiál. Ne’e maka ha’u hanoin katak Tribunál mós tenke koopera, tanba polísia komenta beibeik. Katak, ita kaer ema ho rama ambon hamutuk ho atributu arte-marsiál maibé lori ba Tribunál dehan evidénsia la forte entaun husik fila fali. Ne’e labele akontese beibeik. Se la’e ita provoka malu”, realsa.

Kona-ba elementu arte-marsiál ne’ebé ikus-ikus ne’e hamosu konflitu, Lere hatán nia la temi reativa tanba nia konsidera katak arte-marsiál iha Timor ne’e nunka eziste.

“Balun dehan reativa balun fali dehan organiza maibé ha’u la temi reativa, tanba arte-marsiál iha Timor ne’e nunka eziste. PSHT, Kera Sakti no KORK ne’e Indonézia maka kria iha Timor maibé la’ós ita-nia Governu maka harii. Entaun, arte marsiál ne’e ezisténsia hosi invazaun to’o agora. Tanba ne’e, ha’u dehan la reativa maibé autoriza atu sira bele organiza án liuhusi estrutura própriu, estatutu no sede”, Lere tenik.

Nia esplika kuandu autoriza arte-marsiál eziste iha Timor, Governu mós tenke koordena ho Governu Indonézia katak timoroan la mai subar iha ne’e (Timor) hala’o atividade arte-marsiál ninian no sé maka viola nafatin regra ka regulamentu bele konsidera hanesan kondenadu no krime.

“Só hanesan ne’e maka ita bele kontrola. Kuandu la kontrola sei mosu buat át hanesan krime organizadu no droga”, afirma.

Jornalista: Xisto Freitas

Editora: Rita Almeida

HAKEREK NO HATÁN

Please enter your comment!
Please enter your name here