DILI, (TATOLI) – Atu garante funsionamentu Banku Nasionál Komérsiu Timor-Leste (BNCTL-sigla portugés) hodi kompete iha merkadu ba atividade sosiedade komersiál maka Governu liuhosi sorumutu Konsellu Ministru (KM), ohin aprova estatutu foun BNCTL.
Proposta dekretu lei ne’e aprezenta hosi Ministériu Reforma Lejizlativa no Asuntu Parlamentár hamutuk ho ministériu tutela hanesan Ministériu Finansa no Ministériu Koordenadór Asuntu Ekonómiku.
Ministru Reforma Lejizlativa no Asuntu Parlamentár, Fidelis Leite Magalhães, hatete estatutu foun ne’e atu re-organiza jestaun ba BNCTL, tanba antes ne’e iha membru konsellu administrasaun hamutuk nain lima ho ninia knaar diferente, maibé ho estatutu foun ne’e sei iha de’it prezidente konsellu administrativu ne’ebé la’ós ezekutivu, vise prezidente ida no diretór ezekutivu.
“Xefe Ezekutivu ne’e maka sei kaer jestaun iha banku, enkuntu Prezidente no Vise Prezidente konsellu administrativu sei tau matan ba servisu xefe ezekutivu nian”, dehan ministru ba Tatoli iha Palásiu Governu, ohin.
Estatutu BNCTL tuan fó poder ba membru konsellu administrativu nain lima hala’o knaar ezekutivu iha banku maibé estatutu foun la admite.
Mandatu konsellu administrasaun tuan ne’e kaduka ona iha fin 2018 hodi hein to’o asembleia jerál foun iha marsu 2019 hodi hili prezidente, vise prezidente no xefe ezekutivu foun.
Asaun únika iha BNCTL maka Governu, tanba ne’e iha asembleia jerál ne’e governu maka sei organiza hodi foti desizaun ba estutura foun.
Benefisiu hosi estatutu foun ne’e, ministru esplika di’ak liu ba jestaun, hafasil foti desizaun no kontrolu ativade jestaun banku ho fasíl no lais.
Jornalista: Agapito dos Santos
Editora: Rita Almeida
