Prokuradór Jerál Repúblika, José da Costa Ximenes. Imajen Egas Cristovão

DILI, (TATOLI) – Prokuradór Jerál Repúblika, José da Costa Ximenes, hateten suspeitu ba kazu konflitu entre elementu arte-marsiál sira iha Mulia no Vila Antiga, Baukau, tama ona iha prizaun preventiva.

“Situasaun atuál liu-liu konflitu entre elementu arte-marsiál ne’ebé akontese iha Baukau, Dili no Likisa, Ministériu Públiku (MP) serbisu hamutuk ho Polísia Nasionál Timor-Leste (PNTL) konsege aprezenta ema balun ba Tribunál no aplika ona medida koasaun ka prizaun preventiva ba kazu balun ne’ebé akontese iha Mulia, Baukau, ne’ebé ataka malu to’o sunu uma ida”, Ximenes ba jornalista sira iha Palásiu Prezidente Nicolau Lobato, Bairru Pité, tersa ne’e hafoin hato’o konflitu entre membru artes marsiál ba Xefe Estadu, Francisco Guterres Lú Olo.

Nia hatutan akontese mós iha Vila Antiga, Baukau, iha ne’ebé iha grupu balun entre elementu arte-marsiál hosi Kera Sakti no PSHT hodi estraga ema nia motorizada nomós balun vítima, agora dadauk suspeitu ba kazu refere iha prizaun preventiva ona.

Aleinde ne’e, Ximenes haktuir kazu hanesan akontese mós iha Likisa, tan ne’e prosesu investigasaun ne’ebé hala’o hosi majistradu sira hamutuk ho polísia haree hela ba kestaun ne’e para bele atua iha tempu badak.

Ba kazu ida ne’e, nia afirma konkorda ho Prezidente Repúblika ne’ebé husu atu regulariza grupu arte-marsiál, nune’e bele submete ba jogu desportu.

Jornalista: Xisto Freitas

Editora: Rita Almeida

HAKEREK NO HATÁN

Please enter your comment!
Please enter your name here