DILI, (TATOLI) – Primeiru-Ministru, Taur Matan Ruak, orienta Ministériu Turizmu liuhosi Diretór Jerál Administrasaun Finansa Komponente Turizmu, Augusto Manuel de Oliveira Carvalho, atu dezenvolve sítiu Maubara, nune’e bele atrai turista sira, inklui mós hakiak lafaek.
“Iha 2020, Ministériu Turizmu iha programa prioridade rua maka atu dezenvolve; sítiu Maubara no hakiak lafaek. Ida ne’e orientasaun hosi Primeiru-Ministru rasik”, Augusto ba jornalista sira hafoin hasoru malu ho Xefe Governu, Taur Matan Ruak, iha Palásiu Governu, ohin.
Augusto akresenta planu 2020, Xefe Governu fó rekomendasaun katak Ministériu Turizmu tenke prepara planu didiak, nune’e bele tau orsamentu ne’ebé adekuadu ba dezenvolvimentu iha área turizmu nian no bele iha vantajen direta ba povu.
“Primeiru-Ministru rekomenda mai ami atu halo planu di’ak, tanba parte turizmu nu’udar setór importante atu fó retornu ba Estadu”, haktuir.
Enkuantu, iha ámbitu 2019, Ministériu Turizmu halo de’it servisu ba reabilitasaun sira, hanesan iha sítiu turístiku iha Dili, Maubara no Marobo, nune’e mós sei halo manutensaun iha Ramelau.
Maibé Ministériu Turizmu, dadaun ne’e foku liu ba Dili, hanesan kapitál no odamatan nasaun nian, presiza hatudu imajen di’ak ba mundu maibé to’o agora seidauk organizadu, liliu Dili sei fo’er.
Entretantu, Ministériu Turizmu seidauk iha ministru atu fó orientasaun servisu, maibé ministériu ne’e tutela iha Ministru Prezidénsia Konsellu Ministru, Agio Pereira, kona-ba ezekusaun orsamentu no implementasaun programa.
Jornalista: Zezito Silva
Editora: Rita Almeida
