DILI, (TATOLI) – Bankada opozisaun Frente Revolusionária Timor-Leste Independente (FRETILIN) husu ba ema hotu atu defende no respeita konstituisaun hanesan mahon ba Nasaun ne’e, liuliu prinsípiu separasaun poder.
“Bankada FRETILIN kondena tentativa hotu-hotu atu interfere, intimida, ka enfrakese ita nia orgaun judisiária sira nia dezempeñu”, deputadu Francisco Miranda Branco bainhira halo deklarasaun polítika iha plenária, ohin.
Nia hatutan: “Aktu sira hanesan ne’e viola prinsípiu separasaun de poderes nomós tenta atu satan netik Ministériu Públiku no Tribunál sira nia servisu. Bankada FRETILIN hakarak fó hanoin hikas ba povu tomak katak ita hotu iha obrigasaun atu defende no respeita ita nia konstituisaun ne’ebé fó mahon ba ita iha nasaun ida ne’e”.
Branco realsa se tribunál sira laiha ona kapasidade ka kompeténsia atu hala’o sira nia knaar, sé tan mak bele tesi ita nia lia, sé tan mak bele sai juíz hodi deside entre sala no loos.
Deklarasaun ne’e bazea ba karta Prezidente Aliansa Mudansa ba Progressu (AMP) no Prezidente partidu Kongresu Nasionál Rekonstrusaun Timor (CNRT-sigla portugés), Kay Rala Xanana Gusmão, hakerek ba Prokuradór Jerál Repúblika (PJR), José da Costa Ximenes, iha loron 18 fulan-janeiru tinan ne’e no divulga husi rede sosiál mídia partidu nian.
Hatan ba kestaun ne’e, deputada bankada CNRT, Carmelita Caetano Moniz, rejeita deklarasaun polítika husi bankada FRETILIN.
“Karta ne’ebé Maun Boot Xanana hakerek ba Prokuradór Jerál Repúblika la’os nu’udar intervensaun husi Prezidente Partidu CNRT ba servisu profesionál, investigasaun prosesu judisiál ba Ministériu Públiku ka Prokuradór Jerál Repúblika, la’ós mós presaun ba Prokuradór atu hala’o nia servisu”, esklarese.
Nia mós dehan: “Karta ida ne’e Maun Boot (Xanana) nu’udar sidadaun bain-bain ida hato’o nia protesta no reklamasaun, mós PJR bele konsidera nu’udar keixa ida ba PJR hodi halo prosesu inspesaun no investigasaun ba Prokuradora Repúblika refere ne’ebé hala’o prosesu no nia kna’ar la tuir lei ne’ebé vigora iha ita nia rai”.
Prezidente Komisaun A ne’ebé trata asuntu Konstituisaun no Justisa ne’e reforsa rezidente Partidu CNRT laiha poder atu fó ka la fó autorizasaun ba nia membru partidu ida atu tuir investigasaun iha Ministériu Públiku.
“Prezidente Partidu CNRT laiha knaar ka kompeténsia ida atu simu notifikasaun husi Prokuradora Repúblika ida ne’ebé kaer hela prosesu investigasaun kriminál ba sidadaun ida ka estrutura partidu ida. Tanba ne’e mak Prezidente Partidu CNRT ho laran triste mós taridu, nu’udar sidadaun ha’u la konkorda ho asaun husi Prokuradora Repúblika”, tenik tan.
Jornalista: Julia Chatarina
Editora: Rita Almeida
