DILI, (TATOLI) – Ministru Agrikultura no Peska, Joaquim José Gusmão dos Reis Martins, hatete Ministériu Agrikultura no Peska (MAP) hamutuk ho Diresaun Jerál Estatístika (DJE) sei aselera prosesu Sensu Agríkola 2019 no sei halo hotu sensu tuir tempu, tanba Orsamentu Jerál Estadu (OJE) ba tinan ne’e promulga ona husi Prezidente Repúblika.

“Agradese Na’i Prezidente ne’ebé maka promulga ona (orsamentu) tuir tempu loos, liuliu ba Sensu Agríkola, tanba ita-nia sensu ne’e sei hala’o iha fulan oin, agora, ita-nia preparasaun ba rekrutamentu enumeradór komesa ona ho promulgasaun ita bele ona aselera prosesu ne’e”, afirma Joaquim iha Palásiu Governu, ohin.

Tanba OJE promulgadu no iha semana oin bele asesu ona ba orsamentu sensu nia maka ministru iha esperansa tomak atubele hahú sensu ne’e.

Sobre sensu agríkola ne’ebé ba dahuluk realiza iha Timor-Leste ne’e MAP serbisu hamutuk ho Diresaun Jerál Estatístika Ministériu Finansa, tanba diresaun ne’e iha ona esperiénsia barak kona-ba hala’o sensu. “Ne’e duni ha’u iha esperansa tomak katak ita bele hala’o iha marsu”.

Antes ne’e Diretór Jerál Estatístika, Elias dos Santos Ferreira, hatete tuir planu sensu ne’e sei hala’o iha marsu no abríl nia laran.

“Tanba sá tenke halo sensu iha marsu? Tanba marsu ne’e maka ita-nia umakain sira ne’e hahú kuda rai”, katak.

Iha parte seluk Ministru Agrikultura no Peska hatete sobre ezekusaun orsamentu ba ministériu nia ho montante millaun $14 resin ne’e hodi kontinua programa Governu Konstitusionál Daualuk nian mak hasa’e produsaun liuliu ba hare no batar no foku nafatin ba ida ne’e nomós oinsá maka bele halo espansaun ba área kultiva nia.

Aleinde ne’e MAP mós iha planu atu vizita distritu sira liuliu bá irrigasaun sira ne’ebé eziste tanba relatóriu hatudu iha irrigasaun barak ne’ebé maka afetada husi mudansa klimátika hanesan Bulutu, Maliana I, Oebaba, Karau Ulun ne’e presiza halo normalizasaun nune’e halo serbisu emerjénsia nian.

Ba manutensaun irrigasaun ne’e iha tinan ne’e la tau orsamentu, tanba ne’e rekere ba iha fundu kontijénsia atubele atende ba ida ne’e no iha mós posibilidade ko’alia ho Ministériu Obra Públika bainhira iha kazu emerjénsia bele atende ho ekipamentu pezadu.

Jornalista: Maria Auxliadora

Editora: Rita Almeida

HAKEREK NO HATÁN

Please enter your comment!
Please enter your name here