Ilustrasaun ba falsifikasaun dokumentu. Imajen hosi google.

DILI, (TATOLI) – Prokuradór Jerál Repúblika, José da Costa Ximenes, husu ba ema balun ne’ebé sai vítima ba prosesu falsifikasaun dokumentu veteranu atu keixa ba ministériu públiku.

Prokuradór Jerál Repúblika (PJR), José Ximenes. Foto Tatoli/Egas Cristovão

“Ministériu Públiku komesa promove para kaptura ema balun serbisu iha Sekretariadu Tékniku Administrasaun Eleitorál (STAE), Banku Nasionál Ultramarinu (BNU) no Komisaun Omenajen”, nia dehan ba jornalista sira iha Palásiu Prezidente Nicolau Lobato, Bairru Pité, tersa ne’e, hafoin sorumutu ho Prezidente Repúblika, Francisco Guterres Lú Olo.

Nia hatutan: “Ha’u aproveita okaziaun ida ne’e para informa ba públiku katak vítima ka ema balun ne’ebé sai vítima ba prosesu ida ne’e bele aprezenta keixa ba Ministériu Públiku”.

Prokuradór Jerál hateten ema balun serbisu iha STAE ne’ebé falsifika dokumentu veteranu ne’e uluk serbisu hanesan IT nasionál.

“Ita respeita veteranu orijinál maibé balun suporta fali atividade falsifikasaun dokumentu veteranu”, nia lamenta.

Ximenes haktuir komunidade balun trata dokumentu veteranu ninian ne’ebé loloos simu rihun 20 dolar amerikanu (20 mill) maibé ikus mai simu de’it rihun hitu dolar amerikanu (sete mill) no balun fali simu rihun 13 dolar amerikanu (13 mill) maibé ikus mai simu de’it rihun lima dolar amerikanu (cinco mill) tanba fahe ba grupu ne’ebé ajuda halo falsifikasaun dokumentu.

Jornalista: Xisto Freitas

Editora: Rita Almeida

HAKEREK NO HATÁN

Please enter your comment!
Please enter your name here