Ministru Reforma Lejizlativa no Asuntu Parlamentar, Fidelis Manuel Leite Magalhães. Imajen Egas Cristovao

DILI, (TATOLI) – Governu liuhosi enkontru Konsellu Ministru estraordináriu ohin rona aprezentasaun hosi ekipa Banku Dezenvolvimentu Azíatiku (ADB-sigla inglés) kona-ba lalaok no vizaun jerál ba dezenvolvimentu Timor-Leste ba futuru.

Ministru Reforma Lejizlativa no Asuntu Parlamentár (MRLAP), Fidelis Leite Magalhães, hatete ADB aplika ona métodu no lala’ok ne’ebé ohin aprezenta ba Governu ho  ninia parseiru sira  seluk iha rejiaun sudeste azíatika.

“Vizaun jerál ba dezenvolvimentu atu oinsá ita define futuru no halo esforsu atu atinje objetivu iha futuru, ninia metódu la’ós ita tau futuru dook maibé  define tiha futuru maka ita foin halo metodu aprosimasaun mai kotuk para define di’ak liután lalaok dezenvovimentu para atinje objetivu iha futuru”, dehan ministru ba jornalista sira iha Palásiu Governu, ohin.

ADB iha ninia aprezentasaun apoiu tebes governu hodi trasa polítika ida di’ak liután, atinje dezenvolvimentu bazea ba Planu Estratéjiku Dezenvolvimentu Nasionál tuir kondisaun real povu nian.

“Ohin ne’e governu apresia tebes ho aprezentasaun ne’ebé ADB halo”, haktuir tan. Governu rekuñese ADB nu’udar parseiru importante ida ba governu, tanba fó imprestimu ba governu hodi dezenvolve infrastutura bázika hanesan estrada.

Durante aprezentasaun, parseiru internasionál ne’e hatudu mós modalidade tolu ne’ebé governu bele asesu entermu apoiu,  dahuluk  maka apoiu ho gratuita,  tuir imprestimu ho funan ki’ik no seluk maka apoiu kréditu iha banku ho funan bazea ba lalaok merkadória.

Maibé  Governu konsiente kualker desizaun ne’ebé sei foti tenke fó benefisiu ba dezenvolvimentu nasionál.

“Kualker desizaun ne’ebé maka governu foti tenke  fó vantajen ba governu no nasaun ninia dezenvolvimentu, tanba ne’e ita tenke haree, funan hira, selu oinsá, períodu ita atu selu ne’e oinsá, tanba ne’e governu sei diskute atu foti desizaun di’ak liu”, haktuir  tan.

Nia haktuir aban governu sei realiza workshop ida hodi involve diretór jerál no diretór nasionál iha ministériu hotu atu diskute di’ak liután kona-ba  metódu aprezentasaun ADB nian ba dezenvolvimentu nasionál.

Jornalista: Agapito dos Santos

Editora: Rita Almeida

HAKEREK NO HATÁN

Please enter your comment!
Please enter your name here