Prezidente Parlamentu Nasionál, Arão Noé de Jesus da Costa Amaral. Imajen Tatoli/António Gonçalves

DILI (TATOLI) – Parlamentu Nasionál (PN) kumpre ona notifikasaun hosi Tribunál Rekursu (TR), hodi hatan pedidu fiskalizasaun abstrata ba Lei Atividade Petrolífera (LAP), ne’ebé hato’o husi deputadu opozisaun nain 23 iha loron 30 janeiru.

Prezidente Parlamentu Nasionál (PPN), Arão Noe, hateten PN konsege kumpre notifikasaun antes loron 10 nia laran, tanba notifikasaun ne’e mai iha loron 31 janeiru.

“Parlamentu hato’o ona resposta iha sesta loraik no antes tuku 6 loraik Tribunál Rekursu simu ona resposta, tanba ne’e ita hein desizaun. Normalmente Tribunál Rekursu iha tempu loron 25 nia laran hodi pronúnsia”, tenik PPN ba jornalista sira iha resintu uma fukun, ohin.

Tuir PPN bainhira lei ida em vigór hela, TR halo apresiasaun no  nunka iha desizaun dehan lei ida inkonstitusionál totál, maibé deklara katak artigu ida ou alinea ida de’it.

Por em quanto sei iha desizaun ida, governu sei implementa no  kuandu hahú husi Tribunál Rekursu nia desizaun sai mak iha inkonstitusionalidade hanesan artigu ou alinea ida mak laiha efetu, más sira seluk sei la’o nafatin no  laiha problema kona-ba legalidade. Artigu ou alinea ida laiha validade iha tempu ne’ebé tribunál deklara, la’os nia retroativu fali ba kotuk”, katak.

Nia hatutan kona-ba sosa asaun, prosesu la’o hela no iha tempu besik governu sei lori aprezentasaun ba plenária tanba tuir lei hanesan investimentu ida.

“Sei investimentu, governu tenke mai aprezenta iha parlamentu, tanba ne’e tempu badak governu sei lori mai aprezenta, hafoin aprezenta parlamentu fó apresiasaun no laiha votasaun ida maibé hanesan fó koñesimentu ba parlamentu atu bele iha perguntas ruma, hafoin governu bele ezekuta”, dehan tan.

Entretantu alterasaun LAP konsege hetan apresiasaun dala rua iha PN, tanba alterasaun dahuluk hetan veta husi PR, Francisco Guterres Lú Olo.

Durante apresiasaun dahuluk ba proposta alterasaun ida ne’e, deputadu sira husi partidu opozisaun levanta kestaun kona-ba relevánsia, legalidade no blokeia hasoru sistema transparénsia Estadu nian.

Audisaun Reprezentante Espesiál Governu

Iha loron 27 setembru 2018 reprezentante espesiál Governu, Kay Rala Xanana Gusmão, asina akordu ida ho empreza petrolífera Conocophillips kona-ba partisipasaun iha join venture porsentu 30 ho valór milliaun $350,  ne’ebé hanesan direitu esplorasaun ba kampu mina iha área Greater Sunrise.

Iha loron 6 novembru, komisaun PN halo audisaun ho reprezentante espesiál ba negosiasaun Tasi Timor no hetan informasaun katak Estadu Timor-Leste tenke halo pagamentu to’o marsu 2019, maibé sei kuandu seidauk akontese mak Estadu sei iha multa kada loron ba Conocophillips ho montante $49.000.

Nune’e husi audisaun ne’e, Xanana sujere atu halo alterasaun ba lei atividade petrolíferu ho razaun atu fasilita prosesu atividade petrolífera.

Husi sujestaun ne’e mosu projetu lei husi deputadu bankada governu sira no halo ajenda ba debate no votasaun iha plenária.

Parseiru Join venture Greater Sunrise nia mak Woodside (operadora) ho partisipasaun porsentu 33,4, Conocophillips porsentu 30, Shell posentu 26,6 no Osaka Gas porsentu 10.

Foin lais ne’e, reprezentante espesiál Governu, Xanana Gusmão, ho empreza petrolífera Shell asina tan akordu sosa no faan partisipasaun asaun empreza ne’e porsentu 26,6 ho montante milliaun 300.

Nune’e, bainhira Estadu Timor-Leste halo ona pagamentu ba akordu rua ne’e, mak sei iha partisipasaun porsentu 56,6 iha konsórsiu esplorasaun mina iha kampu Greater Sunrise.

Projetu Lei Passa Ho Maioria

Iha reuniaun plenária estraordinária loron 14 novembru 2018, maske hetan krítika maka’as husi deputadu opozisaun sira (FRETILIN no PD), maibé projetu lei ne’e pasa ho votu a favor 37, kontra 22 no abstensaun 0.

Projetu lei ne’e kontein husi artigu tolu ne’ebé, artigu 1o relativu ho objetu determina lei 1a alterasaun ba lei n.o 13/2005, 2 de setembru, artigu 2 o estabelese redasaun foun husi artigu 22 o lei n.o 13/2005 ne’ebé viza altera no artigu 3 o, estipula entrada vigór iha loron tuir mai bainhira halo publikasaun no redusaun efeitu iha 27 setembru 2018.

Alterasaun konkretu iha proposta ba artigu 22o lei n.o 13/2005 lei atividade petrolífera mak prevee la’ós de’it ba partisipasaun Estadu Timor-Leste iha operasaun petrolífera, mas ema koletiva públika timoroan ne’ebé hakarak direitamente liuhosi entidade seluk totalmente kontrola husi ema koletiva públika rasik.

Nune’e mós limite porsentu 20 ba partisipasaun operasaun petrolífera sira, aplikavel ba kazu iha partisipasaun ne’ebé rezulta trazasaun komersiál ida ou ajudikasaun iha termu lei.

Ikus liu, kontratu hotu atu permite partisipasaun iha operasaun petrolífera sira no relativu ba kondusaun despeza operasaun, maibé hasai fiskalizasaun prévia husi Tribunál Kontas husi Tribunál Superior Administrativu, Fiskál no Kontas.

Veta Dekretu Parlamentu

PR veta dekretu lei ne’e ho razaun atu evita polítika no regra investimentu labele esessivu liu, tanba de’it atividade sira, inklui operasaun petrolífera ne’ebé rekere investimentu diretu husi osan Fundu Minerai.

“Dekretu ida ne’e karik promulga, ninia implikasaun mak sei kria konfuzaun no halo konke ita bele lakon klareza no sei la hatene distingue ona kona-bá saida mak ativu finanseiru no ativu rikusoin-sira seluk, maske Lei Fundu Minarai hakerek klaru tiha ona”, tenik Lú-Oló.

Nune’e mós, tuir Xefe Estadu karik dekretu ne’e promulga, signifika fó lisensa atu duplika meiu atu bele hetan finansiamentu ba operasaun petrolífera sira ka operasaun seluk, katak foti osan diretamente husi Fundu Minarai ka liuhusi Orsamentu Jerál Estadu (OJE).

Reapresiasaun daruak passa ho votu maioria, maski Deputadu Opozisaun sira walk out  

Iha loron 10 janeiru, PN halo ona rapresiasaun ba alterasaun LAP ho votu a favór 41, kontra ida no abstensaun zero. Ho nune’e dekretu apresiasaun foun aprovadu maski bankada Opozisaun FRETILIN walk out (auzente).

Hafoin hetan aprovasaun, alterasaun LAP ne’e haruka hikas ba Xefe Estadu no hetan promulgasaun no públikadu iha Jornál Repúblika iha loron 18 janeiru.

Jornalista: Julia Chatarina

Editora: Rita Almeida

HAKEREK NO HATÁN

Please enter your comment!
Please enter your name here