Prezidente Repúblika, Francisco Guterres Lú Olo, ba jornalista sira hafoin kuda ai-oan iha área salaun Nobre Lahane, sesta, (8/2/2019). Imajen Egas Cristovão

DILI, (TATOLI) – Prezidente Repúblika, Francisco Guterres Lú Olo, rekomenda ba Governu no Parlamentu Nasionál atu halo lei para reativa hikas atividade arte-marsiál ne’ebé antes ne’e Governu desidi taka.

Lú Olo hateten presiza reativa arte-marisiál nune’e sira bele hamriik hanesan organizasaun desportiva ida atu partisipa iha kompetisaun iha nasaun laran, internasionál no rejionál.

“Portantu, ita fó valór ba sira nia talentu ne’ebé maka iha liuhusi jogus artes marsiais ka jogu artes desportivas nian”, Xefe Estadu ba jornalista sira iha Palásiu Nobre Lahane, Dili, sesta ne’e relasiona ho konflitu entre membru arte-marsiál sira iha rai-laran.

Nia mós apela ba membru arte-marsiál atu labele estraga malu no tenke haree malu di’ak nafatin nune’e bele halo rai ida ne’e hakmatek atu fó espasu ba dezenvolvimentu nasaun.

Entretantu, Komandante Jerál Polísia Nasionál Timor-Leste (PNTL), Júlio da Costa Hornay, konsidera konflitu entre membru iha Timor hahú sa’e ba beibeik.

“Hanesan ita hotu akompaña katak iha Baukau foin lalais ne’e, estraga uma lubuk ida no foin lalais ne’e mós iha Fatukesi, Likisa, akontese problema entre membru arte-marsiál. Situasaun ida ne’e maka sai preokupasaun ba ita”, nia dehan ba jornalista sira iha Palásiu Prezidente Nicolau Lobato, Bairru Pité, kinta (7/1), hafoin levanta situasaun rai laran ba Xefe Estadu.

Hornay afirma presiza toma atensaun ba átu krime ne’ebé maka prátika hosi membru sira. “Komandu PNTL haruka ona karta ba Ministru Defeza no Seguransa atu bele halo operasaun ba membru artes marsiais ne’ebé maka demaziadu ona. Ita lakohi rai ida ne’e artes marsiais maka domina fali. Artes marsiais hanesan grupu ida ne’ebé fasparte hosi komunidade Timor, tan ne’e tuir loloos ita hotu nu’udar timoroan, ita sente katak rai ida ne’e ita nian, ita hotu-hotu tenke kontribui ba estabilidade no pás”, realsa.

Jornalista: Xisto Freitas

Editora: Rita Almeida

1 KOMENTÁRIU

  1. Iha nasaun barak la iha Arte-Marsial ema nia desporto no nasaun lao ba oin no capaz tebes tanba saiba mak Timor preocupado loz ho arte-marsial? iha Constituição RDTL hakerek momos iha neba so frente tolu deit mak liberta rai ida ne, se ita nia lider político sira kesi an hela ho arte marcial par hetan votus hodi hetan kadeira kolia momos deit ba povo lalika Kari rairahun ba povo nia matan tanba problema nebe akontese laloz arte marcial deit mak buka istraga malu maibe da-la barak povo aileba ida la tuir arte marcial ne mak sai vítima ba sira nia hahalok. Economicamente arte marcial lori retorno saida ba estado no contribui saida ba desenvolvimento? Arte marcial sira nebe buka halo instabilidade iha nasaun laran diak liu TAKA ta deit tanba sira viola ema seluk nia direito nebe consagra iha Constituição RDTL ao mesmo tempo pior liu tan mak la iha artigo ida mak cita ga defende arte marcial A ga B ida (nia naran) iha Constituição RDTL.
    Tuir hau nia hanoin TAKA ta deit. Maibe se dehan TAKA ne mak sai fali diculdade então halo reforma ba instituição segurança (PNTL) tanba la iha capacidade atu halo segurança ba povo, ABRAÇOS…

HAKEREK NO HATÁN

Please enter your comment!
Please enter your name here