DILI, (TATOLI) – Ministru Transporte no Komunikasaun (MTK), José Agostinho da Silva, kinta lokraik ne’e aprezenta planu asaun anuál ba tinan lima no rezultadu servisu durante fulan hitu ba Primeiru-Ministru, Taur Matan Ruak, iha Palasiu Governu hafoin simu pose hosi Prezidente Repúblika iha loron 22 juñu 2018.
Nia hatete durante fulan hirak ne’e konsege kria lei organiku ministériu nian, estabelese estrutura, liuliu kargu xefia hahú hosi xefe departamentu to’o diretór jerál.
Alende ne’e nomeasaun ba kargu xefia sira iha orgaun autónoma sira hanesan Autoridade Nasionál Komunikasaun (ANC-sigla portugés), no Administrasaun Aeroportu no Navegasaun Aerea Timor–Leste (ANATL-sigla inglés).
“Ami mós konsege estabelese diresaun nasionál administrasaun no finansa no hili diretór jerál ba diresaun ne’ebé durante ne’e laiha”, dehan ministru.
Nune’e mós estabelese enkuadramentu jurídiku, liuliu prepara lei kona-ba rekolla reseita doméstika iha orgaun autonomia sira hanesan Servisu Autoridade Portuáriu Timor-Leste (APORTIL), ANATL, no Diresaun Nasionál Transporte no Terrestre (DNTT).
Sorumutu ne’e, nia mós halo aprezentasaun ba Xefe Governu kona-ba koperasaun governu ho ajénsia kooperasaun internasionál hosi Japaun (JICA-sigla inglés) iha Timor-Leste ba projetu aeroportu internasionál Komoro nomós apoiu formasaun ba rekursu umanu iha área tékniku.
Nune’e mós kooperasaun ho Governu Alemãna liuhosi projetu ajénsia Alemãna ba kooperasaun téknika (GTZ-sigla inglés) iha Timor ba kontrusaun ró-ahi Berlin-Nakroma segundu ho orsamentu pur volta euro milliaun hitu no Governu TL investe milliaun $17.9.
Ró Nakroma rua ne’e sei fasilita komunidade iha parte norte, leste no súl hanesan Baukau, Lautein, Vikeke, Same, Suai no Ataúru.
Liga ho dezenvolvimentu informasaun no komunikasaun teknólojia, tuir ministru banku mundiál fó ona asiténsia ba dezenvolvimentu área refere.
“Primeiru-Ministru fó apoiu polítika ba planu no programa ministériu transporte no komunikasaun, liuhosi proposta OJE tinan ne’e milliaun $6.7 kompara ho tinan kotuk hetan de’it envelope fiskál milliaun $2.6 ba salariu ne’e minimu tebes”, katak tan.
Jornalista: Agapito dos Santos
Editora: Rita Almeida
