Grupu servisu interministeriál, ohin realiza enkontru preparasaun relatóriu implementasaun ODS ba Nova Iorke iha fulan-jullu tinan ne’e. sorumutu ne’e hala’ao iha edifísiu MNEK, Praia dos Coqueiros. Imajen Egas Cristovão

DILI, (TATOLI) – Koordenadora Unidade Planeamentu, Monitorizasaun no Avaliasaun (UPMA), Brigída Soares, hatete molok Timor-Leste aprezenta rezultadu implementasaun Objetivu Dezenvolvimentu Sustentável (ODS) iha Nova Iorke, jullu tinan ne’e, presiza akomoda uluk opiniaun hotu.

Koordenadora Unidade Planeamentu, Monitorizasaun no Avaliasaun, Brigída Soares. Imajen Egas Cristovão

“Ita reativa fila fali grupu traballu ne’ebé mak uluk iha ona atu hetan koordenasaun ne’ebé mak di’ak entre entidade hothotu, sosiedade sivíl, parseiru dezenvolvimentu sira, nune’e bele akomoda hothotu nia opiniaun”, hateten Brigída Soares ba ajénsia TATOLI iha edifísiu Ministériu Negósiu Estranjeiru no Kooperasaun (MNEK), Praia dos Coqueiros, lorokraik ne’e hafoin enkontru membru grupu traballu  preparasaun relatóriu ODS.

Kriasaun grupu traballu ne’e kumpre ba fundamentu legál hanesan rezolusaun governu nú. 34/2015, loron 23 setembru no inisialmente estabelese husi primeiru-ministru altura ne’ebá liuhusi despaxu nú. 038/2015/XII/PM, loron 24 dezembru.

Brigída Soares dehan enkontru faze daruak ne’e ho inísiu iha segunda, loron hirak ba kotuk diskusaun membru toka ajenda tolu hanesan regulamentu interna, ne’ebé fó sai hotu ona, hein hela despaxu ofisiál husi Primeiru-ministru.

Segundu mak grupu traballu sei haree opsaun saida mak bele serve hodi lori ba Konsellu-ministru sobre proposta ne’ebé mak atu lori ba relata, kolesaun dadus sira ne’ebé tuir mai presiza atu halo hodi kompleta relatóriu ne’e.

“Entaun iha opsaun tolu ne’ebé mak iha, opsaun ida mak ita fó (ODS), númeru tuir faze roteiru implementasaun ne’e rasik. Iha ne’ebá foku númeru 2,3,4,5,6 no 9. Ida ne’e mak ita atu relata”, dehan Koordenadora.

ODS númeru 2 mak eradika hamlaha, 3 ne’e saúde no bem-estar, 4 ne’e edukasaun ho kualidade, 5 ne’e igualidade jéneru, 6 ne’e bee moos no saneamentu no 9 ne’e mak indústria, inovasaun no infrastrutura.

Brigída Soares  hatutan opsaun segundu fokus ba ODS lima ne’ebé atu relata, ODS númeru 17 ne’e kompletu. “Entaun ida ne’e, grupu traballu diskute hamutuk, nune’e bainhira iha ona konsensu, lori ba aprezenta iha Konsellu-ministru”.

Nia akresenta nu’udar ekipa tékinku sira prepara informasaun hothotu. Depois nivel polítiku, hein atu foti desizaun para serbisu kolesaun dadus ne’e bele la’o.

“Entaun ida ne’e mak progresu ne’ebé ba dadaun ne’e halo, segunda-feira iha tiha ona reuniaun hodi introduz, iha segunda reuniaun ne’ebé agora dadauk halo ne’e foku liubà oinsá mak hohotu hetan konsensu opsaun ida ne’ebé mak atu ba aprezenta iha Konsellu-ministru”, relata Brigída Soares.

Nia mós haktuir Timor-Leste adopta ODS ne’e iha 2015, ho rezolusaun husi Parlamentu Nasionál (PN) nomós despasu governu nian liuhusi Primeiru-ministru. Nune’e, estabelese grupu traballu hodi halo alineamentu, entre Planu Estratèjiku Dezenvolvimentu Nasionál (PEDN) ho ODS ne’ebé mak Timor-Leste adopta.

“2015 to’o 2016 grupu traballu serbisu barak ona i iha ne’ebá halo ona alineamentu hodi goal (objetivu), target (alvu) no indikadór sira ne’ebé mak alina ho ita-nia Planu Estratéjiku Dezenvolvimentu Nasionál. Husi rezultadu ne’ebá ita haree katak iha indikadór SDG ne’ebé mak iha; 2022, ita alina de’it 110”, afirma.

Brígida fó razaun katak husi indikadór ne’ebé iha Timor-Leste, nasaun ne’ebé restaura nia indepedénsia iha 2002 ne’e, la’ós Timor-Leste lakohi implementa, maibé tanba iha objetivu ka alvu barak ne’ebé la relevante ho kontestu nasaun.

“Entaun ida ne’e, hanesan nasaun barak ne’ebé mak hetan indepedénsia kle’ur ona, dezenvolvimentu la’o dook loos ona, i iha indikadór balun mak relevante. Maibé ita adapta de’it ida ne’ebé mak konserta ka relevante ho ita-nia kontestu nasaun ninian”, esklarese.

Nia mós haktuir tan grupu traballu tékniku durante ne’e iha ona no paradu de’it mak iha sétimu governu konstitusionál. Maske nune’e agora reativaf fali, atu iha preparasaun relatóriu ne’ebé mak agora dadauk atu lori ba Nova Iorke ne’e bele prepara ho didi’ak no inkluzivu; la husik hela ema ida iha kotuk.

Koordenadora katak tan antes aprezenta iha fulan-jullu, sei aprezenta uluk relatóriu ida ho lia-fuan 700 iha fulan-maiu.

“Sei haruka tuir e-mail ba Nova Iorke i depois relatóriu ne’e kompletu sei haruka iha fulan jullu, aprezentasaun ne’ebé sei reprezenta husi governu iha ne’ebá”.

Tanba ne’e, molok Timor-Leste aprezenta, reuniaun grupu traballu, sira fahe ona serbisu entre membru sira, ne’ebé mai husi liña ministeriál, no deside ona katak SEKOMS (Sekretáriu Estadu Komunikasaun Sosiál) mak sei lidera mídia sira no oinsá bele prodús video ho durasaun minute lima hodi aprezenta, maske nune’e ho kooperasaun ministeriál la’ós SEKOMS mesak.

“SEKOMS sei serbisu hamutuk ho mídia tomak ne’ebé mak eziste iha Timor-Leste hodi bele iha konsensu iha opiniaun hodi bele iha rezultadu maizumenus proposta saida mak ita halo iha ne’ebá”.

Koordenadora Interina Grupu Traballu, Brigída Soares akresenta kampaña nivel nasionál ba implementasaun ODS iha Timor-Leste la’ós governu de’it maibé komponente hotu iha sosiedade.

“La’ós de’it governu mak responsavel maibé hanesan babain temi; doadór sira, parseiru dezenvolvimentu ne’ebé mak hola parte iha ne’e; sosiedade sìvil, akadémiku, igreja, setór privadu, hothotu hola parte atu fó kontribuisaun ba implementasaun ida ne’e”, katak.

Jornalista: Rafy Belo

Editora: Rita Almeida

HAKEREK NO HATÁN

Please enter your comment!
Please enter your name here