DILI, (TATOLI) – Diretór Jerál Sekretariu Estadu Formasaun Profesionál no Empregu (SEFOPE), Paulo Alves, hatete tinan ne’e SEPFOPE reativa fali formasaun lian-Korea ba joven timoroan hamutuk 2000.
“Iha tinan ne’e SEPFOPE sei reativa fila fali formasaun lian-Korea ba timoroan sira ne’ebé hakarak ba servisu iha Korea Sul hamutuk 2000. Maibé ita hein orsamentu ne’ebé sei promulga hosi Prezidente Republika”, Paulo Alves ba jornalista sira iha Palásiu Governu hafoin partisipa reuniaun Konsellu Ministru, ohin.
Kursu lian-Korea ne’e SEPFOPE sei loke iha munisípiu sira. Tanba governu iha kompromisu atu tinan ne’e sei haruka traballadór timoroan ba servisu iha Korea Sul.
“Ita servisu hamutuk ho Embaixada Korea Sul iha Timor-Leste, sira oferese ona profesór voluntáriu lian-Korea nian atu hanorin iha sentru formasaun no iha ensinu vokasionál neen”, dehan.
Maske nune’e, atu ba Korea Sul la’ós buat ida fasil, tenke tuir formasaun durante fulan neen hafoin tuir ezame, tuir teste médiku no rejistu iha sistema baze dadus.
Kuandu hetan ona kontratu, entaun ezame médiku dala ida tan, se la liu, bele hela ona. Kuandu liuhosi ezame kuandu ba ona Korea, sei kontinua mós sei ezame médiku dala ikus atu determina servisu eh la’e depende ba kondisaun saúde.
Totál traballadór timoroan ne’ebé iha Korea Sul hamutuk 3.144 no 705 mak fila mai ona Timor-Leste. Iha Korea Sul, durasaun servisu tinan tolu to’o tinan lima, kuandu kontratu hotu fila mai Timor-Leste.
Entretantu, SEPFOPE iha Departamentu Formasaun Merkadu Traballu iha Unidade peskiza nian, haree katak kuaze iha mudansa barak ba traballadór sira, karik iha ida ka rua mak la iha mudansa maibé barak iha mudansa, hanesan uluk sira hela uma piku maibé sira mai halo ona uma kalen, balu haruka nia alin ba eskola, balu loke negósiu, balun hola kareta, balun loke kioske.
Jornalista: Zezito Silva
Editora: Rita Almeida
