Timor-Leste Komemora Tinan 40 Saudozu Nicolau Lobato nia Mate

0
138
Saudozu Nicolau Lobato. foto: GPR

DÍLI, (TATOLI)- Estadu, governu no povu Timor-Leste komemora tinan 40 Saudozu Nicolau Lobato nia mate, ho jornada husi Palásiu Prezidente, Aitarak Laran, Díli to´o rotunda estatua Saudozu Nicolau Lobato nian, Comoro-Díli, ho kari aifunan.

Prezidente Repúblika, Francisco Guterres, Lú-Olo, iha nia diskursu hateten katak estadu hili loron mate Prezidente Nicolau Lobato nian, hodi fó-hanoin erói hothotu sira-nia sakrifísiu fó-aan ba mate, iha Timor-Leste tomak.

“Ho laran-ksolok mak ha’u hatán programa ho Jornada ida hahú husi Palásiu Prezidensial Nicolau Lobato no ramata iha rotunda Nicolau Lobato. Ha’u sente ksolok boot tebtebes tanba Prezidente Nicolau Lobato nia oan mesak, alin José Lobato Gonçalves, hato’o rasik ninia sentimentu iha Palásiu Prezidensiál kona-ba nia aman, aman Nasaun Timor-Leste nian, ne’ebé husik hela oan-ki’ikoan no kaben, hodi entrega aan tomak ba ita-nia kauza nasionál,” dehan xefe estadu timoroan.

Prezidente Repúblika, Francisco Guterres, Lú-Olo haktuir katak oan mane saudozu nian, José Lobato Gonçalves, “Zezinho”, boot iha Indonézia no simu edukasaun no domin tomak husi nia tia Olímpia Barreto no tiu José Gonçalves. Parente rua ne’e sai Zezinho ninia inan-aman, husi kedas loron 8 Dezembru 1975, bainhira nia inan rasik, Isabel Barreto, hetan tiru no mate iha ponte-kais, Dili.

“Ba señora Olímpia no família sira seluk, ne’ebé hadomi oan-ki´ak sira, hanesan sira-nia oan-rasik no, hanorin ba sira espíritu domin ba Povu no Nasaun Timor-Leste, ha’u hato’o hako’ak boot ho rekoñesimentu Estadu tomak nian,”hateten prezidente repúblika hodi reforsa: “Ba oan-kiak no faluk sira no maluk hothotu ne’ebé lakon família uma laran, kiik ka boot, iha tempu rezisténsia nian, ha’u hato’o mós ha’u nia hako’ak boot,”.

Prezidente Repúblika, Francisco Guterres, Lú-Olo, haklaken mós ba povu doben Timor-Leste katak baibain, bainhira ita temi eróis, ita-nia neon halai liu ba erói sira ne’ebé mate iha luta libertasaun nasional, husi 1975 to’o 1999.

“Ohin ha’u hakarak fó-hanoin mós erói sira ne’ebé hamriik, ho idaidak nia kbiit, iha idaidak nia reinu, iha tempu beiala sira-nian. Sira-nia hahalok brani iha tempu ne’ebá, hatudu kedas katak timoroan sira la moris hakmatek, bainhira forsa militár ruma tama hosi rai-li’ur hodi obriga ita moris haraik-an no hakru’uk ba sira. Ita-nia beiala sira halo revolta hasoru kolonialismu portugés, ho kro´at iha liman, iha fatin no tempu oioin,” haktuir xefe estadu.

Xefe estadu konta katak Revolta ne’ebé organizadu no kle´ur liu hahú iha 1912, iha Manufahi, hala’o tinan tolu tuituir malu, ho D. Boaventura ninia komandu. Revolta organizadu ikus liu akontese iha Uatolari, Uatukarabau no Vikeke, iha tinan 1959.

Kolonialista portugés konsege hamate revolta sira ne’e. Ita la manán ukun-an tanba ita-nia beiala sira-nia forsa-kro´at la liu okupante sira-nian no, revolta sira ne’e halo ketaketak, nu’udar reinu ka grupu anti-kolonialista. Maluk barak mate iha revolta sira ne’e no barak hetan-dadur, inklui D. Boaventura.

Husi lakon ne’e, tuir Prezidente repúblika katak timoroan sira aprende lisaun boot ida. Grupu ki´ik, ne’ebé halibur subar-subar iha tempu kolonialismu portugés, haree ba esperiénsia beiala sira-nian, buka hela oinsá kore Povu, bainhira Governu Salazar monu, iha Portugal. Hafoin administrasaun portuguesa fó liberdade ba ita-nia Povu, atu organiza-an no hili ita-nia futuru, grupu ki´ik ne’e hamosu kedas sira-nia vizaun nasionalista, ne’ebé haree ba Timor-Leste tomak, nu’udar Nasaun ida, Povu ida, ho hakarak ida de’it.

Ho tempu, vizaun nasionalista ne’e habelar babeibeik ho forsa polítika sira-nia partisipasaun, Igreja Katólika no konfisaun reliziosa sira seluk no sidadaun sira.

Ho vizaun polítika luan ida ne’e mak líderes 75 konsege mobiliza ita-nia Povu no ita konsege tanen ita-nia luta libertasaun nasionál durante tinan rua nulu resin hat no, ita manán ukun-rasik-an, liuhusi referendu 1999.

Saudozu Nicolau dos Reis Lobato mak lidera grupu ki´ik ne’ebé, ikus mai, haboot-an liuhusi ASDT no FRETILIN – FRENTE ida ne’ebé hako’ak timoroan hothotu. Maioria husi grupu ki´ik ne’e mate ona. Maibé nain- rua sei moris. Ida mak irmaun Mari Alkatiri, ida fali mak irmaun José Ramos Horta, ne’ebé sei hamutuk ho ita no, kontribui nafatin iha ita-nia segunda faze luta libertasaun.

“Luta resisténsia hasoru okupasaun la’ós espontáneu maibé organizadu ho objetivu ida de’it: Ukun rasik-an,” konsidera Prezidente Repúblika, Francisco Guterres, Lú-Olo.

Prezidente Repúblika akresenta, liuhusi Lei n.° 3/2016, ho data 25 Maiu 2016, loron 31 Dezembru konsagra ona iha Timor-Leste, nu’udar feriadu nasionál hodi Povu tomak presta omenájem ba ita-nia éroi sira, iha loron mate Prezidente Nicolau Lobato nian.

Nune’e, importante tebtebes timoroan hothotu hatene Prezidente Nicolau Lobato ninia vida no ninia pensamentu. Tanbasá no oinsá nia entrega-an ba Povu no Nasaun ida ne’e. Saída loos mak nia hanoin no mehi atu hetan, iha tempu ida ne’ebé ema oituan liu mak fiar, katak Timor-Leste bele ukun rasik-an. Sá estratéjia mak nia hili, hamutuk ho líder sira seluk, atu hatán ba momentu polítiku idaidak ho dezafiu oioin. Sá orientasaun mak nia fó atu hametin rezisténsia tinan tolu tuituir malu, hafoin invazaun no okupasaun indonézia.
Ohin tempu lató atu sura vida no hahalok hothotu Nicolau Lobato nian.

“Ho laran-ksolok mak ha’u agradese inisiativa husi señor Padre Martinho Gusmão, ne’ebé haka’as-an no konsege publika livru ida, ho mensájens no diskursus Prezidente Nicolau Lobato nian,” agradese prezidente repúblika.

“Ha’u konvida maluk sira hotu rona Padre Martinho Gusmão tuir mai no estuda livru ne’e, atu koñese di’ak liu Prezidente Nicolau Lobato nia karáter, ninia hanoin no hakarak ba rai doben ida ne’e,” konvida xefe estadu timoroan ne´e.

Prezidente akresenta tan katak legadu husi Prezidente Nicolau Lobato boot tebtebes. Bainhira ita koñese dadaun Prezidente Nicolau Lobato, ita haree katak nia moris ho espíritu umanu nakloke ba Povu tomak. Espíritu ida ne’e mak halo nia husik ninia empregu di’ak iha administrasaun portugeza hodi entrega-an tomak ba sensibiliza ita-nia ema, atu organiza-an no hamrrik, nu’dar Povu, ho kbiit rasik.

Hahalok ne’ebé  hakarak temi liuliu ohin, husi legadu Prezidente Nicolau Lobato nian, mak kooperativa. Atu hala’o polítika “habelar espíritu koletivu ho prátika tulun malu” iha área produsaun no konsumu, lideransa FRETILIN hamosu kooperativa rua, iha Marsu 1974. Ida, iha Fahilebu, Bazartete, Liquicá, lidera husi membru CCF, aswa´in Nicolau Lobato, iha altura ne’ebá Vise-Prezidente FRETILIN. Kooperativa ida seluk harii iha Ostico, Oilubo, Vemasse, Baucau, lidera husi membru CCF, aswa´in Vicente dos Reis Sa’he.

Espíritu kooperativista katak, tulun malu ho hakarak ida de’ it, mak sai sustentu ba ita aguenta funu, iha tinan rua nulu resin haat nia laran. Ita-nia maluk agrikultór sira prodús ba fó-han aswa´in sira no maluk sira seluk, iha sidade-laran, arriska sira-nia vida, hodi hato’o apoiu oioin, ne’ebé FALINTIL no líder polítiku sira presiza ba sira-nia moris no hatutan luta ba beibeik.

Ho laran-ksolok aas tebetebes mak hatene katak ita-nia alin barak hatutan espíritu kooperativista ne’ebé mosu iha 1975 no haburas iha tempu luta libertasaun nasionál. Hafoin ita ukun-an, movimentu harii kooperativa hahú kedas ho espíritu Nicolau Lobato no Vicente dos Reis Sa’he nian. Ohin loron iha ona organizasaun-mahon ba kooperativa sira, hanaran Federasaun Hanai Malu, ho membru liu rihun sanulu resin hitu, ohinloron.

Hein katak iha tempu badak kooperativa barak sei mosu iha área rurál no kontribui ba hasa’e produsaun agrikultor sira-nian no hamosu empregu.

“Ha’u hein mós katak rede transporte no merkadu lokál sei buras liután no, loron ruma, kooperativa sira, hamutuk ho empreza agríkola boot sira, bele garante beibeik produtu agríkolas ho kuantidade natón no ho kualidade di’ak, atu Povu tomak hetan alimentasaun ho kualidade, Timor-Leste bele kompete iha merkadu internasionál ho susesu no Timor-Leste bele harii ekonomia ida sustentável,” espera lider timoroan ne´e.

Xefe estadu reforsa, maioria Povu agrikultor no sira-nia moris loroloron nian no futuru oan sira-nian, depende liuliu ba agrikultura, nu’udar sira-nia fonte prinsipál rendimentu. Ho laran-taridu mak ha’u haree Orsamentu Jéral Estadu 2019 la tau interese aas iha agrikultura.

Maibé susesu iha agrikultura depende mós husi polítika sira seluk. Asesu ba bee-moos no ba bee ba sira-nia natar no toos seidauk to’o ba ema hothotu. Oinsá agrikultór sira no sira-nia oan iha asesu ba eskola no informasaun no, ba fasilidade saúde, sei preokupa ha’u tebetebes, nu’ udar Prezidente ba ema hothotu.

Ita tama tinan foun ho preokupasaun boot no oioin, liuliu ba sira ne’ebé iha kbiit-laek, inklui kombatente libertasaun nasionál ne’ebé moras no la hetan tratamentu saúde, la iha uma, hahán ho kualidade, eletrisidade no bee moos.

Biar hasoru situasaun fahe malu, ho maioria hasoru minoria no vise-versa, iha Parlamentu Nasional, ha’u fiar katak ita sei bele hetan dalan, liuhusi diálogu permanente no sei kuda fila fali relasaun di’ak, ho fiar ba malu, iha tempu badak. Demokrasia la’ ós de’it maioria ka minoria. Demokrasia signifika vontade atu fó solusaun ba problema oioin, ne’ebé ita-nia Povu hasoru iha sira-nia moris loroloron!

“Ohin ita hothotu, iha loron erói sira-nian, iha monumentu Nicolau Lobato nian, iha Nicolau Lobato nia oin, ita hothotu reafirma lori ba oin espíritu luta aswa´in sira-nian. Ha’u fiar katak espíritu erói hothotu nian, sei la mate, iha knua ne’ebé de’it, no sei haforsa ita babeibeik,” garante prezidente repúblika.

Xefe estadu dehan, Ita hothotu tenke simu katak ita tenke hakruuk ba lei no regra. La’ós lei no regra mak tenke hakru’uk ba ita, maibé ita mak tenke la’o tuir lei no regras, atu sosiedade bele organiza-an ho di‘ak no moris iha pás no estabilidade-laran, ho fiar ba Estadu. Ita-nia Lei inan hatuur Estadu-de-Direitu-Demokrátiku, nu’ udar dalan di’ak liu, ba ita-nia moris, nu’ udar Povu no Nasaun. Timor-Leste iha poder ida de’it, poder ida ne’ebé hatane lejitimasaun husi Direitu!

“Ha’ u fiar katak ita bele hakaat dezafiu hothotu bainhira ita hatene rona malu no fó-liman ba malu. Ita bele hakaat dezafiu ne’ebé mosu iha ita-nia atividade loroloron nian, iha ita-nia relasaun ba malu, nu’udar ema ba ema no nu’udar organizasaun ba organizasaun. Ita-nia órgaun soberania iha kbiit ketaketak maibé iha devér rona malu no simu malu tuir Lei-inan haruka. Bainhira vontade iha, husi sorin-sorin, ita bele hakaat dezafiu ne’ebé de’ it,” nia garante.

Iha biban ne´e, Prezidente Rpúblika, Francisco Guterres, Lú-Olo, ba povu Timor-Leste katak sá legadu mak Nicolau Lobato husik mai ita hotu? Sá lisaun mak ita bele hasai husi vida Prezidente Nicolau Lobato nian?  Katak mehi, ideál no hakarak Povu nian husu espíritu sakrifísiu, dedikasaun tomak, seriedade, responsabilidade, sentidu devér, étika, laran-nakloke ba diálogu ho sentidu koletivu, lideransa ne’ebé serve Povu tomak.

“Ha’u fiar katak líderes ne’ebé horiuluk fó-an tomak ba rai ida ne’e, sei hatutan legadu ida ne’e no nune’e, kaer ita-nia prezente, nu’ udar ponte metin ida, ne’ebé sei lori duni Povu tomak ba moris-di’ak,” garante Prezidente Repúblika, Francisco Guterres, Lú-Olo.

Prezidente hatutan, husi líder no partidu polítiku hothotu, hein kolaborasaun tomak atu ita bele hakaat dezafiu sira ne’ebé sei mosu iha 2019 no ba oin.

Husi líder Igreja Katólika no Konfisaun Relijioza sira seluk, Organizasaun husi Sosiedade Sivíl, Forsa Defeza no Seguransa no husi mós sidadaun idaidak, hein mós kolaborasaun tomak atu lori Timor-Leste ba oin, ho ambiente hakmatek, estabilidade no konfiansa.

“Tempu to’o ona atu ita hamutuk hodi hatuur metin ita-nia Estadu-de-Direitu-Demokrátiku. Timor-Leste presiza ita hotu-hotu nia kbiit no matenek ho sentidu koletivu, atu serví ita-nia Povu no Nasaun! La iha sentidu komemora loron Eróis  no, fó onra ba ita-nia líder nasionál, Nicolau dos Reis Lobato, bainhira ita la hatuir sira-nia mehi no hakarak,” konklui Prezidente Repúblika, Francisco Guterres, Lú-Olo.

Entretantu, Prezidente Nicolau Lobato mate tinan-40 liubá iha kombate, iha Mindelo, iha 31 Dezembru 1978.

Partisipa iha jornada  no kari aifunan, iha ámbitu ba komemorasaun tinan 40 ne´e mak lider timoroan sira, akadémiku, sosiedade sívil sira, konfisaun relijioza sira, estudante nomós povu timoroan sira.

 Jornalista: Rafy belo

Editór : Manuel Pinto

HUSIK IDA HATÁN