Soe Lixu Arbiru Sei Multa Dolar Ida To’o Rihun Ida

0
187
Fatin lixu iha entrada ba Kristu Rei. Imajen espesiál

DILI, (TATOLI) – Governu kria ona dekretu lei númeru 33/2008 hodi fó sansaun ba sidadaun bainhira la kumpre regras no regulamentu hodi soe lixu arbiru hahú ho montante dolar ida to’o $1000 hodi asegura sidade kapitál.

Ministru Administrasaun Estatal en ezersísiu, Abílio José Caetano, hateten prepara ona diploma ministeriál ida hodi hahú implementa, atu sidadaun hotu kumpre no apoiu ba prosesu dezenvolvimentu.

“Atu implementa ida ne’e atraves diploma ministeriál ida, tanba ne’e ami prepara hela diploma ministeriál ida para fó sansaun ba ema soe lixu arbiru”, dehan nia ba Tatoli iha Palásiu Governu, ohin.

Governu sei implementa dekretu lei kuartu governu konstitusionál iha 2019. Polítika seluk mós sei implementa dekretu lei númeru 2/2017 ho rezolusaun governu númeru 32/2016 kona-ba zero plástiku durante mandatu governu, liuliu introdús plástiku ne’ebé halo hosi ai-farina kulit hodi hamenus importasaun plástiku kímiku.

Nune’e mós sei entrega servisu hamos sidade ba setór privada. “Ita tenke privatiza, tanba agora ne’e governu maka kaer hotu entaun ema sira ne’ebé servisu funsionáriu públiku, entaun sira mos iha diretu bainhira lisensa no feriadu, tanba ne’e iha semana rua natal no tinan foun lixu nakonu”, tenik governante.

Jornalista: Agapito dos Santos

Editora: Rita Almeida

HUSIK IDA HATÁN