Sentru Formasaun Tibar Prepara Ona Joven 4537

0
71
Ilustrasaun hosi google.

TIBAR, (TATOLI) – Sentru Nasionál Empregu no Formasaun Profesionál Tibar, munisípiu Likisa oferese ona sertifikadu formasaun profesionál ba joven 4537 ne’ebé tuir formasaun profesionál durante tinan 10 resin hahú 2002 to’o 2018.

Tuir relatóriu hosi totál formandu ne’ebé hetan ona sertifikadu, porsentu 70 hetan ona servisu no restu kria empregu ba án rasik.

Diretór Sentru Nasionál Empregu no Formasaun Profesionál Tibar, Simão Tito Barreto, dehan formandu hirak ne’e balun servisu iha indústria mina hanesan Pertamina, Esperansa Timoroan (ETO), iha área ospitalidade nivel III, balun servisu iha Otél Timor, Esplanada.

Hosi parte konstrusaun sivíl, kompañia Hilton Internasionál Fatuhada mos kontrata formandu barak hodi servisu. “Ami involve mós formando barak iha programa seasonal worker ba Austrália no traballadór ba Korea do Súl”, tenik nia ba jornalista sira iha Tibar, kinta ne’e.

Sentru ne’e fó formasaun ho akreditasaun hosi INDMO hanesan kontrusaun jerál nivel I kompsotu hosi alvenaria, karpintaria, eletrisidade, kanalizasaun no soldadura.

Alvenaria ho nivel II no III, karpintaria nivel II no III, kanalizasaun nivel II no III, eletrisidade nivel II no III, painel solár, indústria marítima no portu, ospitalidade nivel I no II, lideransa iha projetu, operasaun no manutensaun bomba bee no elétrika.

Alende ne’e jestaun portu marítima, eletrisidade instrumentasaun, auto mekánika no operadór pezada, enerjia limpa no adaptasaun mudansa klimátika no dezenvolvimentu inkubadora empreza.

Tuir nia iha ona ekipamentu bázika hanesan makina produsaun, ekipamentu feramenta ba servisu típiku, iha aperelo hodi halo teste ba ekipamentu, maibé presiza investe hodi sosa tan ekipamentu ho nivel avanzadu bazea ba modernizasaun teknolojia.

Alende ekipamentu, sentru formasaun iha sala hamutuk 20, sala prátika, teória, ofisina, dormitóriu, kantina, bar ba aprendizajen, ortikultura hodi prodús ai-han no naan balun hodi fornese fila fali ba formadór, funsionáriu, formandu.

Sentru Tibar ho ninia formadór hamutuk 30 resin iha área ne’ebé eziste no planu sei aumenta to’o 50. “Ita presiza investe di’ak liután iha kualifikasaun formadór, ekipamentu hodi reforsa iha kualidade aprendizajen”.

Atu abranje formasaun to’o munisipiu, tinan kotuk servisu hamutuk ho Rejiaun Administrativa Espesiál Ambenu-Oekusi (RAEOA) loke ona sentru formasaun ho administrativa hosi sentru formasaun Tibar, konsege fó ona formasaun ba joven 50. Tanba ne’e tuir planu iha 2019, sei fó tan formasaun ba joven 100-150 iha Oekusi.

Tuir polítika governu, kada tinan sentru ne’e tenke oferese formasaun ba foin-sa’e to’o 600. Entretantu, sentru ne’e tutela ba Sekretariu Estadu Formasaun Profesionál no Empregu (SEFOPE) iha 2002 no 2009 sentru ne’e define hanesan institutu públiku liuhosi dekretu lei 4/200, 15 de janeiru ne’ebe públikadu iha jornal repúblika.

Sentru ne’e harii liuhosi akordu kooperasaun entre Estadu Timor-Leste no Portugal ho misaun promove no fomenta formasaun profesionál, liuliu iha setór konstrusaun sivíl no abranje tan ba setór sira seluk.

Sentru ne’e autonomia administrativa finanseira no patrimoniu rasik, servisu hamutuk ho SEFOPE. Sentru ne’e iha responsabilidade atu kapasita formandu sira ho kualidade, nune’e bele hetan empregu no asegura nivél di’ak kona-ba koñesementu teória no prátika liuhosi formadór rai-laran no estranjeiru.

Jornalista: Agapito dos Santos

Editora: Rita Almeida

HUSIK IDA HATÁN