Prezidente Repúblika Konsidera OJE 2019 La Ekilíbriu

0
439
Xefe Kaza Sivíl Prezidensia Repúblika, Francisco Maria de Vasconcelos. Imajen Mídia PR

DILI, (TATOLI) – Prezidente Repúblika (PR), Francisco Guterres Lú Olo, veta dekretu númeru 4/V hosi Parlamentu Nasionál kona-ba Orsamentu Jerál Estadu (OJE) 2019, tanba konsidera orsamentál ne’e laiha balansu no alokasaun la benefísia ba sidadaun.

Deklarasaun veta ne’e fó sai hosi Prezidente Repúblika liuhusi Xefe Kaza Sivíl Prezidénsia Repúblika, Francisco Maria de Vasconcelos, iha Palásiu Prezidente Nicolau Lobato, Bairru Pité, kuarta ne’e.

Xefe Estadu veta dekretu refere bazea ba kbiit ne’ebé atribui liuhusi Konstituisaun Repúblika artigu 85 alínea a no númeru 1 artigu 88.

Tuir Prezidente veta orsamentu ne’e ho razaun valór bilaun  rua no atus ida tolu nulu resin rua ($2.132 milliaun) nu’udar orsamentu aas liu iha istória Timor. Signifika defísit orsamentál aas teb-tebes, katak Estadu tenke foti osan tan atu kompleta Orsamentu ne’e.

“Tanba laiha fonte seluk atu hatama osan ba orsamentu ne’e, Estadu tenke foti hodi biit osan liu-tan hosi Fundu Minarai”, afirma.

“Ba OJE 2019, Dekretu Parlamentu Nasionál husu atu foti tan porsentu atus rua haat nulu resin sia (249%), liu dook Rendimentu Sustentável Estimadu Fundu Minarai nian. Tuir loloos, hasai de’it dólar amerikanu milliaun atus lima rua nulu resin sira, ka porsentu tolu, hosi Fundu Minarai, ne’ebé  hanesan sasukat ka kalkula tinan-tinan”.

Lú Olo akresenta labele haluha katak presu mina iha merkadu mundiál mós tun dadaun ona no osan ne’ebé tama iha Fundu Minarai mós tun dadaun ona.

Aleinde ne’e, tuir nia volume minarai hosi kampu Bayu-Undan mós tun dadaun ona no sei tun ba beibeik. Fundu ne’e labele sai sustentável bainhira Estadu hasai osan barak beibeik, liu RSE (Rendementu Sustentável Estimadu) hosi Fundu Minarai.

“Governu rasik fó-sai dadus katak seidauk hetan alternativa finansiamentu hosi rekursu minarai foun seluk. Biar Governu fó-sai estimativa  ida ne’e, Governu la foti medidas atu kaer metin sustentatibilidade finanseira”, haktuir.

Prezidente Repúbika dehan polítika ekonómika no finanseira la hatuir regra no prinsípiu Konstituisaun RDTL no lei sira ne’ebé fó dalan ba dezenvolvimentu, hanesan rezerva finanseira obrigatória, unidade orsamentál no investimentu ne’ebé justifika hetan tranferénsia direta hosi Fundu Minarai.

Nia hatutan OJE 2019 mós la hatuir Programa Governu ne’ebé aprova hosi Parlamentu Nasional kona-ba diversifikasaun ekonómika no harii empregu no tau prioridade atu investe iha kapitál sosiál.

Alende ne’e, Xefe Estadu argumenta alokasaun orsamentál sira ladún fó benefísiu ba sidadaun sira. Katak osan boot liu katak porsentu tolu nulu resin rua (32%) ka tersu ida (1/3) hosi OJE aloka ba sosa patrimóniu hosi kompañia  estranjeira mina nian, entretantu porsentu sanulu de’it (10%)  mak fahe ba edukasaun no formasaun profisionál, saúde, agrikultura no turizmu.

“Hosi porsentu sanulu ne’e (10%), porsentu ida (1%) tau ba agrikultura, maizumenus porsentu neen (6%) ba setór edukasaun no porsentu tolu (3%) ba setór saúde no porsentu zero pontu lima nulu resin haat (0.54%) tau ba turizmu. Valor kiik ne’e labele satisfáz nesesidade sira iha área serbisu sosiál sira no la fó dalan ba kresimentu ekonómiku iha área sira ne’e”, akresenta Lú Olo.

Razaun seluk, Xefe Estadu afirma OJE 2019 la hatudu polítika alternativa finansiamentu ne’ebé bele konvense katak, biar la’ós sustentável, bele lao ba oin, dentru prazu badak no médiu, bele hala’o dezenvolvimentu sustentável no Estadu sei la tama iha falénsia finanseira ka fiskal cliff no mosu fenómenu ne’ebé baibain ema bolu “maldisaun rekursus nian”.

Liuhosi mensajen fundamentada, Prezidente Repúiblika husu ba Parlamentu Nasionál atu tetu fila fali Dekretu ne’e ho hanoin katak tenke uza ho di’ak rekursu finanseiru sira ne’ebé pertense ba Estadu no Povu Timor-Leste.

Nia esklarese bainhira uza rekursu sira ne’e liuhosi dalan justu, ekilibradu, sustentável no efisiente liu-tan mak bele satisfás nesesidade lor-loron povu nian no fó dalan ba kresimentu no dezenvolvimentu nasionál, garante sustentabilidade ba ekonomia hodi fó moris di’ak ba oan no bei-oan sira iha futuru.

Jornalista: Xisto Freitas

Editora: Rita Almeida

HUSIK IDA HATÁN