PJR Fó Pose Ba Prokuradór Na’in Rua No Inspetora Ida

0
118
Prokuradór Jerál Repúblika, José Ximenes, Inspetora Ministériu Públiku, Zelia Trindade, prokuradór distritál sira foto hamutuk hafoin toma pose. Imajen António Goncalves

DILI, (TATOLI) – Prokuradór Jerál Repúblika (PJR), José da Costa Ximenes, loraik ne’e fó pose ba Inspetora Ministériu Públiku, Zélia Trindade, ho mandatu tinan tolu no José Elo nu’udar Prokuradór Distritál Suai no Mateus Nessi kontinua mandatu ba daruak iha Prokuradória Distritál Oe-kusi.

Zélia Trindade, antes ne’e hanesan adjunta PJR, hahú husi 2012 to’o 2018 no José Elo, antes ne’e hanesan Prokuradór Repúblika iha terseira klase no Mateus Nessi simu kargu hanesan Prokuradór Distritál Oe-kusi, hahú husi loron 1 janeiru 2016 no agora simu fali pose ba mandatu daruak nian ho kargu hanesan.

PJR, José da Costa Ximenes, hateten toma pose ne’e nu’udar nosaun reál husi istória no aktu ba momentu signifikadu.

“Marka istória tanba serbisu inspeksaun ne’e timoroan tomak mak kaer. Iha asesória balun só para ajuda de’it kestaun tékniku ruma”, katak José da Costa Ximenes ba jornalista sira iha salaun PJR Kolmera, loraik ne’e.

PJR, José da Costa Ximenes haktuir hahú 2000 kuandu instituisaun judisiária sira harii no prosesu formasaun hahú 2004, nafatin depende ba internasionál sira, ne’e demaziadu.

“Entaun polítika ne’ebé mak ita iha mak tenke fó fiar ba timoroan sira asume rasik kargu importante ne’e. Ho serbisu inspesaun ninian, ita-boot sira (jornalista-red) bele haree, serbisu hothotu husi Ministériu Públiku kaer rasik husi timoroan”, realsa.

Nia afirma tan: “Ita iha asesória ne’e normál, iha kualker país iha mundu. Mas, sira la mai ona kaer prosesu, buat prinsipál sira ne’ebé mak deside ita atu deside, ema mak atu kaer, lae ona. Entaun faze importante ida ita hahú iha 2019 ninian”.

Nia hatutan ho prezensa prokuradór sira no inspetora bele reforsa liután servisu Ministériu Públiku nian.

“Kargu xefia sira ne’e kuandu kle’ur demais, entaun laduun di’ak. Entaun, balun seis anos ona, ita troka. Balun quatro, anos, três anos ita troka. Hanesan ida ne’e, bele fó fali oportunidade ba prokuradór sira seluk para dezenvolve prokuradória iha distritál sira no lori ministériu, instituisaun ne’e ba oin liután”.

Prokuradór Jerál Repúblika, José Ximenes. Imajen António Goncalves

Ba prokuradória distritál sira seluk, Prokuradór José da Costa Ximenes katak sei nomeia tan, karik iha tan planu, tuir nesesidade, prokuradória bele estabelese tan iha fatin ne’ebé seidauk eziste.

Kona-ba infrastrutura, prokuradór timoroan ne’e dehan iha Baukau, rezidénsia ofisiál. Se la iha, lei réjime remuneratóriu ba sira, sira bele hetan, bele hela iha uma ne’ebé governu aluga.

Hanesan Suai, iha rezidénsia, Maliana iha, Ermera iha, Oe-kusi iha rezidénsia. “Agora ita atu konstrui tan iha Lospalos ne’e mós iha rezidénsia. Purtantu, Vikeke agora dadauk funsiona, rezidénsia iha. Sasan sira, mobiliáriu iha kompletu. Sira prontu para halo sira-nia serbisu de’it”.

Nia mós esplika, prokuradór distritál sira ne’e tuir estatutu bolu nu’udar prokuradór xefe. Iha prokuradór repúblika, ne’e prokuradór babain de’it.

“Ita iha prokuradór distritál ne’e haat de’it mak xefe. Ita iha trinta  e tal prokuradór, xefe ne’e iha na’in haat de’it, depois mak iha adjuntu, prokuradór jerál, inspetór sira. Agora xefe sira ne’e, ita bolu komisaun serbisu”, esplika.

Nia esplika tan Komisaun serbisu ne’e, bele dehan tinan tolu, iha dalan klaran, bainhira tinan ida de’it, nia serbisu la di’ak, labele halo jestaun di’ak iha distritu bele troka.

Konsellu hanoin katak nia relasaun ho orgaun Polísia Kriminál, Polísia Investigasaun sira la’o la di’ak, impaktu ne’e prosesu sa’e, krime aas, sira la konsege rezolve, Konsellu nomea ema seluk bele troka, katak tan.

“Sira-nia dezempeñu serbisu ne’e submete ba avaliasaun permanente, to’o fin mandatu. Se nia di’ak, promove”, afirma.

Iha fatin hanesan, Inspetora Zélia Trindade, ba jornalista sira hateten kargu ne’ebé simu liuhusi desizaun Konsellu Superiór Ministériu Públiku no depozita konfiansa no sai hanesan previlejiu ida hodi kontribui ba Ministériu Públiku.

Inspetora Ministériu Públiku, Zelia Trindade. Imajen António Goncalves

“Serbisu ida ne’e, serbisu pedagójika ida ne’ebé mak importante tebes hodi haree no fiskaliza serbisu Ministériu Públiku nian nomós haree oinsá serbisu méritu ba prokuradór sira nian. Ida ne’e mak funsaun nu’udar inspetora. Ne’e importante tebes”, hateten Inspetora Zélia Trindade.

“Ida ne’e hanesan esforsu ida ba ha’u rasik, tanba ha’u bele serbisu oinsá hetan rezultadu di’ak, liuliu oinsá atu mellora servisu Ministériu Públiku nian atu haree ajente ministériu públiku ou prokuradór sira ninia serbisu la’o sai di’ak liu, kualidade no garante duni legalidade iha ita-nia rain”, esplika Inspetora kona-ba kargu ne’ebé nia asume.

Partisipa iha tomada pose ne’e autoridade Ministériu Públiku sira balun, konvidadu nomós família husi emposadu sira.

Jornalista: Rafy Belo

Editora: Rita Almeida

HUSIK IDA HATÁN